Pavlodar oblysynda qatty daýyldyń saldarynan 38 eldi meken jaryqsyz qaldy

<p>PAVLODAR. KAZINFORM - Surapyl jel elektr jelilerin úzip, bir aýyldyq mekteptiń shatyryn zaqymdaǵan. Qazir óńirde 47 apattyq brıgada aqaýlardy joıýmen shuǵyldanyp jatyr.</p>

Ótken túnde Pavlodar oblysy aýmaǵynda sekýndyna 28 metrge deıin jyldamdyqpen daýyl turyp, sońy aqtútek boranǵa aınaldy. Qatty jeldiń saldarynan 38 eldi mekende elektr energııasynyń ishinara óshýi tirkeldi.

«Jeldiń saldarynan 38 eldi meken boıynsha jalpy sany 4 276 abonent jaryqsyz qalǵan. Búgin saǵat 14.00-degi jaǵdaı boıynsha elektr qýaty óńirdegi 25 aýyldyq eldi mekende qalpyna keltirildi. 13 aýyldyq eldi mekende (jalpy sany 1 553 abonent) jóndeý jumystary jalǵasyp jatyr. Bul eldi mekender Baıanaýyl, Pavlodar, Tereńkól, Ýspen, Sharbaqty aýdandarynda jáne Aqsý qalasynyń aýyldyq aımaǵynda ornalasqan», - dep habarlady Pavlodar oblysy ákiminiń baspasóz qyzmetinen.

Ekpindi jel Jetekshi aýylynda (Pavlodar qalasynyń ákimshilik aýmaǵy) ornalasqan jalpy orta mekteptiń shatyryn ishinara zaqymdaǵan. Shamamen jalpy aýdany 30 sharshy metr shatyr julynǵan. 

Qazirgi sátte óńir boıynsha 47 avarııalyq brıgada tótenshe oqıǵa saldaryn joıýmen aınylysýda. Jalpy sany 137 adam men 46 tehnıka jumyldyrylǵan.