Pavlodar oblysynda kámeletke tolmaǵan qyzdardy zorlaýdyń úsh faktisi tirkeldi

<p>PAVLODAR. KAZINFORM &ndash; Jasóspirim qyzdardy jynystyq qatynasqa májbúrleýdiń úsh birdeı oqıǵasy keıingi bir apta kóleminde anyqtalyp otyr. Al, jyl basynan kámelet jasyna jetpegenderdiń jynystyq qol suǵylmaýshylyǵyna qarsy qylmystar boıynsha 10 fakti belgili bolǵan.&nbsp;</p>

Bul týraly Bala quqyqtary jónindegi óńirlik ýákil Sáýle Shákenova habarlady. 

– Pavlodar oblysynda kámelet jasyna tolmaǵan 13, 16 jáne 17 jasar qyz balalardy zorlaý faktisi rastaldy. Alǵashqysy Ekibastuz qalasynda bolǵan. Er adam Telegram messenderjeri arqyly qyzben sóılesip, keıin onymen kezdesip, oıyndaǵy zulym áreketin júzege asyrǵan. Al, 16 jáne 17 jasar qyz balalar ózge óńirlerde turady. Olar ózderiniń zorlyq-zombylyqtyń qurbany bolǵany týraly eshkimge tis jarmaǵan. Barlyǵymen sóılestim. Qyzdardyń biri birneshe kún otyra almaǵanyn moıyndady. Qolyn ustaǵanymda dirildep, kóz jasyn tógip, jylady. Men bul jaǵdaıǵa onyń kináli emes ekenin túsindirýge tyrystym. Statıstıkaǵa súıensek, zorlyq-zombylyq jasaıtyndar kóbine óz ákesi nemese ógeı ákesi, otbasynyń ózge týystary, birge turatyndar, kórshileri, otbasynyń dostary bolyp keledi. Jynystyq turǵydaǵy zorlyq-zombylyqty kim jasasa da oǵan aqtaý men keshirim bolmaýy kerek, - dedi Sáýle Shákenova Kazinform tilshisine bergen suhbatynda.

Al, Pavlodar oblysy polıtsııa departamenti bastyǵynyń orynbasary Safýan Jampeıisov 16 jáne 17 jastaǵy qyzdardy zorlaý faktisi boıynsha bir kúdikti azamattyń ustalǵanyn málimdedi. 

«Kámeletke tolmaǵandardy zorlaý faktisi boıynsha tergeý júrgizilip jatyr. Qajetti saraptamalar taǵaıyndaldy», - dep málimdedi ol. 

Bala quqyqtary jónindegi ombýdsmen jalpy jyl basynan Pavlodar oblysynda kámelet jasyna tolmaǵandardy zorlaý boıynsha 10 fakti tirkelgenin aıtady. Onyń 6-aýy boıynsha qylmystyq is qozǵalǵan. 

Eske sala keteıik, Pavlodarda 12 jastaǵy oqýshy qyz dúnıege sábı ákeldi.