Pavlodar oblysynda epızootııalyq lımfangıt indeti tabylǵan aýyl karantınge jabyldy

<p>PAVLODAR. KAZINFORM - Qaýipti mal indeti Ekibastuzdyń Besqaýǵa aýylyndaǵy jylqy sharýashylyǵynan anyqtalǵan. Búginge deıin dertten 3 janýar ólgen.</p>

Bul týraly óńirlik veterınarııa basqarmasy epızootııaǵa qarsy is-sharalar bóliminiń basshysy Samat Majırov habarlady.

- 2024 jyldyń 14 aqpanynda Ekibastuz aýyldyq aımaǵynyń Qoıandy aýyldyq okrýgine qarasty Besqaýǵa aýylynda («Qýanysh» ShQ) 1 bas jylqy ólgeni tirkeldi. Jylqylar arasynda epızootııalyq lımfangıt jáne saqaý aýrýlaryn boldyrmaý úshin patologııalyq materıal iriktelip, zerthanaǵa jiberildi. 19 aqpan kúni zerthanalyq zertteýler ólgen janýarda epızootııalyq lımfangıt derti bolǵanyn anyqtady. Tabynda shamamen 624 bas jylqy bolǵan, onyń 223-i – bıeler, - dep málimdedi veterınarııa basqarmasynyń ókili.

Eldi mekende lımfangıt aýrýynyń rastalýyna baılanysty Qoıandy aýyldyq okrýginiń ákiminiń qaýlysymen 20 aqpannan jylqylarǵa epızootııalyq karantın salyndy. Karantındik jaǵdaılarda aýrý janýarlardan alynǵan ónimderdi satýǵa, tasymaldaýǵa, ákelýge, áketýge jáne paıdalanýǵa tyıym salynady.

«Veterınarııalyq-sanıtarlyq erejelerge sáıkes aýrý mal qan shyǵarmaı joıylýy kerek. Ólgen janýarlardyń ushasy terisimen birge joıylady. Ekibastuz qalasynda janýarlardyń ólikterin órteý úshin jyljymaly órt sóndirý qondyrǵysy jumys isteıdi. Janýarlardy saýyqtyrý sharalary, sondaı-aq sharýashylyqtan alyp qoıylǵan jáne joıylǵan aýrý janýarlardyń qunyn óteýdi Respýblıkalyq epızootııaǵa qarsy jasaq júzege asyrady. Al karantın sońǵy aýrý mal joıylǵannan keıin, jylqylardy qorytyndy klınıkalyq tekserýden, úı-jaılardy tazalaýdan jáne dezınfektsııalaýdan ótkizgen soń 3 aıdan soń alynady», - dep túsindirdi S.Majırov.

Qoıandy aýyldyq okrýginiń ákimi Erjan Ýrazalımovtyń aıtýynsha, búginge deıin «Qýanysh» sharýa qojalyǵynda juqpaly dertten 3 bas mal ólgen. 

Sharýashylyqtaǵy ózge janýarlar veterınarııalyq dárigerlerdiń baqylaýyna alyndy.