Pavlodar oblysynda barlyq baǵyttaǵy joldar jabylyp, eldi mekenderde jaryq óship jatyr

<p>Aýa raıynyń kúrt nasharlaýynan oblys aýmaǵyndaǵy barlyq avtojoldar jabyldy. Baıanaýyl, Aqqýly aýdandarynda jaryq óship qalǵan, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Surapyl jel Pavlodar oblysynyń aýmaǵynda oıran salyp jatyr. Óńirlik tótenshe jaǵdaılar departamenti qatty boranǵa baılanysty barlyq baǵyttaǵy avtojoldar jabylǵanyn habarlady.

Búgin tańerteń Pavlodar qalasynyń Lomov kóshesinde qýat kabeli isten shyqqany sebepti úsh birdeı yqshamaýdanda jaryq sónip qalǵanyn habarlaǵan edik.

Tústen keıin «Soltústik qalalyq» qosalqy stantsııasyndaǵy 1-sektsııasy apattyq jaǵdaıda ajyrady.

Osyǵan baılanysty qalanyń soltústik bóliginde, atap aıtqanda: Nazarbaev dańǵyly — Lermontov — Toraıǵyrov — B.Jyraý kósheleri sharshysynda jáne Teleortalyq aýdany men Qamzın — Aımaýytov, Toraıǵyrov — Akademık Bekturov kósheleriniń sheginde elektr energııasyn berý shekteldi.

«PETK» AQ Shyǵys kásipornynyń jóndeý brıgadasy elektr energııasyn keshki 6-larda qalpyna keltirdi.

Alaıda keshkilik surapyl jel kúsheıe túsip, saǵat 21.30 shamasynda LEP 110 kv áýe jelisi elektr qýatynan ajyrap qalǵan.

Saldarynan qalanyń ortalyq jáne shyǵys bólikterinde elektr jaryǵy joǵalyp ketti.

Buǵan qosa qazirgi ýaqytta Baıanaýyl, Aqqýly aýdandarynyń basym bóligi jaryqsyz qalǵan.

Avarııalyq brıgadalar jaryqty qalpyna keltirý jumysymen shuǵyldanyp jatyr.

Oblystyq jedel shtab ázirshe óńir boıynsha naqty aqparat usyna almaıtynyn málimdedi.

Eske salyp óteıik, daýyldyń saldarynan búgin keshkilik Pavlodardaǵy 52 mln teńgeniń shyrshasy qulap qaldy.