Pavlodar oblysynan ásker qataryna 800-ge jýyq bozbala attanady

<p>PAVLODAR. KAZINFORM - Jas sarbazdar Otan aldyndaǵy boryshyn Ulttyq ulan, Qarýly kúshter jáne Shekara qyzmetinde óteıdi. Bıyl Pavlodar oblysynan áskerge 800-ge jýyq adamdy shaqyrý josparlanǵan.</p>

Kúzgi áskerge shaqyrý naýqany 2 qyrkúıekte bastaldy. Áskerge shaqyrylýshylar medıtsınalyq tekserýden ótedi.

- Bizdiń Pavlodar oblysyna berilgen jospar boıynsha shekara qyzmetine 80 azamatty shaqyramyz. Qarýly kúshter qataryna - 250, Ulttyq ulan qataryna 270-teı azamat alynýy kerek. Onyń ishinde memlekettik kúzet qyzmeti bar. Tótenshe jaǵdaı mınıstrliginiń qataryna 20 adam alynady. Barlyǵy 786 jas azamatty ásker qataryna shaqyramyz, - deıdi óńirlik qorǵanys isteri jónindegi departament bastyǵynyń orynbasary Almasbek Buharbaev.

Byltyr kóktemde Ertis-Baıan óńirinen 862 jas sarbaz ásker qataryna attanǵan. Qazir olar azamattyq boryshyn atqaryp júr. Ásker qataryna shaqyrylmas buryn el azamattary baqylaýdan ótedi. Arnaıy komıssııa densaýlyǵy men fızıkalyq daıyndyǵyn tekseredi.

Byltyrdan bastap Qorǵanys mınıstrliginiń bekitilgen buıryǵyna sáıkes, Otan aldyndaǵy boryshyn ótep kelgen azamattar ulttyq biryńǵaı test tapsyrmaı belgili bir joǵary oqý oryndaryna tegin oqýǵa túse alady. Buǵan qosa, bıyldan bastap nesıesi bar sarbazdarǵa kredıttik demalys qarastyrylǵan.

Eske sala keteıik, TJM-niń áskerı bólimderine qazaq batyrlarynyń esimi beriledi.