Pavlodar oblysy keıbir azyq-túliktiń arzandyǵy boıynsha elimizdegi bestikke kiredi

<p>PAVLODAR. KAZINFORM — Pavlodar oblysynda «Pavlodar» áleýmettik-kásipkerlik korporatsııasy negizinde qurylǵan bir turaqtandyrý qory jumys isteıdi. Onda búginde jalpy kólemi 13,8 myń tonna azyq-túlik ónimderi saqtalyp tur.</p>

Azyq-túliktiń 12 ataýly túri oblys boıynsha 201 áleýmettik dúken men áleýmettik saýda núktelerinde satylady.

«Pavlodar» áleýmettik-kásipkerlik korporatsııasy» AQ turaqtandyrý qorynyń dırektory Azamat Dándibaevtiń aıtýynsha, qazirgi kúzgi kezeńde kóptegen azyq túrine tutynýshylar tarapynan suranystyń joqtyǵyna nemese kúrt azaıyp ketkenine baılanysty qorda arnaıy tizimge enetin ónimderdiń keıbiri joq. Mysaly, kúnbaǵys maıy men kartopqa qazir múlde suranys joq. 

Óńirdiń turaqtandyrý qorynan ónimder myna baǵada satylyp jatyr:

• Qaraqumyq (kg) — 130 teńge;
• Birinshi sortty un (kg) — 145 teńge;
• Tuz (kg) — 55 teńge;
• Kúnbaǵys maıy — (lıtri) — 630 teńge (qazir bul ónim qorda joq, óndirýshiler syǵymdap alyp jatyr, jaqyn arada túsedi);
• Kúrish (kg) — 350 teńge;
• Makaron (rojkı, kg) — 250 teńge;
• Qyryqqabat (kg) — 95 teńge;
• Qant (kg) — 410 teńge;
• Kartop (kg) — 110 teńge;
• Sábiz — (kg) 110 teńge;
• Pııaz (kg) — 102 teńge;
• Taýyq jumyrtqasy (ondyǵy) — 426 teńge.

— Bizde keıbir azyq-túlik ónimderi, sonyń ishinde kókónis pen kartop qoımaǵa arnaıy salynbaıdy. Olar sharýa qojalyqtarynyń kókónis qoımalarynda saqtalyp turady, qajet kezinde aldyrtamyz. Oblysta kúrish baǵasyn yryqtandyrý ári kólemin kóbeıtý maqsatynda jýyqta korporatsııa qorǵa 204 tonna kúrish satyp aldy. Aldaǵy ýaqytta taýyq jumyrtqasyn da qajet kólemde satyp alý josparda tur. Qysqy ýaqytqa qajet kókónis túrleri boıynsha da qosymsha satyp alýlar júrgizilýi múmkin. Biraq bizdiń óńirde kókónis ónimderi mol jınalatynyn eskersek, kartop jáne keıbir kókónister boıynsha qorǵa naqty satyp alýlar júrgizilmeıdi. Sebebi ónimdi jergilikti naryqta arzan baǵada ótkizýge qyzyǵýshylyq tanytatyn sharýashylyqtar jetkilikti, - dep jaýap berdi A.Dándibaev Kazinform tilshisiniń saýalyna.

Joǵaryda atalǵan 201 áleýmettik saýda núktesinen bólek, Pavlodar qalasynda «Jailau» fermerlik bazary jumys isteıdi. Onda satylatyn azyq-túlik taýarlary tikeleı jergilikti óndirýshilerden jetkiziletindikten naryqtaǵy baǵadan 15-20%-ǵa arzan.

Bıyl Ekibastuz ben Aqsý qalalarynda da osyndaı bazarlardyń qurylysy qolǵa alynyp jatyr.

Qazirgi ýaqytta Pavlodar oblysy azyq-túlik baǵasynyń arzandyǵy jóninen 7 pozıtsııa boıynsha respýblıkadaǵy óńirler arasynda TOP-5 tizimine kiredi. Atap aıtqanda:

1. birinshi sortty un
2. qaraqumyq jarmasy
3. sary maı
4. sút (2,5%)
5. aıran (2,5%)
6. kartop
7. sábiz.