Pavlodar munaıhımııa zaýyty avıaotyn óndire bastaıdy

ASTANA. QazAqparat - 12 mamyrda QR Energetıka mınıstri Qanat Bozymbaev Pavlodar oblysyna jumys sapary sheńberinde Pavlodar munaıhımııa zaýytynda bolyp, kásiporyndy jańǵyrtý jobasynyń iske asyrylýymen tanysty, dep habarlaıdy QazAqparat.

«Pavlodar munaıhımııa zaýyty» JShS jurtshylyqpen baılanys bóliminen málim etkendeı, zaýyttyń bas dırektory Shýhrat Danbaı  Energetıka mınıstrine jańa tehnologııalyq nysandardaǵy qurylys-montajdaý jumystarynyń mehanıkalyq aıaqtalýy týraly baıandady.

2017 jylǵy 24 sáýirde Pavlodar MÓZ atalǵan tehnologııalyq keshenderde qurylys-montajdaý jumystaryn mehanıkalyq aıaqtaý týraly aktilerge qol qoıyldy. Qazirgi ýaqytta bul obektilerde, kúkirt óndirý qondyrǵysy kesheni shilde aıynda, al ızomerleý jáne nafta splıtteri qondyrǵysy -qyrkúıekte aıaqtalýy josparlanǵan, iske qosý-baptaý jumystary júrgizilýde. Osy ýaqytqa deıin kásiporyn kepildik paıdalaný kórsetkishterine qol jetkizip, K4 (analog Evro-4)  ekologııalyq klasty joǵaryoktandy avtomobıl benzınin alýy kerek. Jańǵyrtý  aıaqtalǵannan  keıin joǵaryoktandy avtomobıl benzınin shyǵarý  297 myń tonnaǵa deıin artady.

Qazirgi ýaqytta jańǵyrtý jobasy sheńberinde qoldanystaǵy:  munaıdy bastapqy óńdeý kesheni (LK-6Ý)- dızel otynyn jáne kerosındi gıdrotazartý, atmosferalyq aıdaý, naftany gıdrotazartý, katalıtıkalyq rıformıng qondyrǵylaryn qaıta jańartý jónindegi qurylys-montajdaý jumystary oryndalýda. Dızel otynyn jáne kerosındi gıdrotazartý qondyrǵysyn qaıta jańartý kásiporynǵa 2017 jylǵy qarasha-jeltoqsan aılarynda K4, K5 standartty dızel otynyn jáne avıatsııalyq otyndy shyǵarýdy bastaýǵa múmkindik beredi.

Jańǵyrtý aıaqtalǵannan keıin zaýyt shyǵaratyn barlyq ónim Keden odaǵy tehnıkalyq reglamentiniń talaptaryna tolyq kólemde sáıkes keletin bolady.