Pavlodar munaı zaýytynda qondyrǵy isten shyǵyp, dızel óndirisi toqtap tur

PAVLODAR. QazAqparat - «Pavlodar munaı-hımııa zaýyty» JShS-de «Er Lıkıd Munaı Teh Gazy» JShS menshigindegi sýtegi óndirý qondyrǵysynan aqaý tabylyp, dızel otynynyń óndirisi ýaqytsha toqtaǵan edi, dep habarlaıdy QazAqparat.

2023 jylǵy 10 aqpanda sýtegi óndirisiniń kólemi tómendep, tehnologııalyq gazdy sýtegi óndirý qondyrǵysynyń bý rıformınginiń peshine tasymaldaıtyn qubyrdyń dánekerleý tigisinde tabylǵan aqaýdy joıý boıynsha jóndeý jumystary bastaldy.

2023 jylǵy 13 aqpanda jóndeý jumystary aıaqtalyp, sýtegi óndirý qondyrǵysynda iske qosý sharalary bastaldy.

14 aqpanda dızel otynynyń óndirisi qaıta bastalady.

Aqaý tabylǵan ýaqytta PMHZ-da dızel otynynyń qory 20 myńnan astam tonna edi.

Bul kásiporynǵa jóndeý jumystary aıaqtalǵansha jospar boıynsha táýligine 5 myń tonnaǵa deıin jóneltýge múmkindik beredi.

Zaýytta avtobenzın óndirisi qalypty, ónim jospar boıynsha jóneltilýde – táýligine 5,5 myń tonnaǵa deıin.

Sýtegi óndirý qondyrǵysy toqtap turǵan kezde jınalǵan munaı ónimderiniń quramdaýyshtary naýryz aıynda taýar ónimi bolyp óńdeledi.

Osylaısha PMHZ kóktemdegi egis dala jumystary bastalǵanda dızel otyny óndirisiniń josparly kólemin qamtamasyz etetin bolady.

Foto: pnhz.kz