Pavlodar munaı óńdeý zaýyty 40 kúnge jóndeýge jabylady
14:42, 06 Maýsym 2023
ASTANA. QazAqparat – Elimizde dızel men A-95 benzıniniń qajetti qory qalyptasty. Bul týraly Energetıka mınıstri Almasadam Sátqalıev málim etti, dep habarlaıdy QazAqparat tilshisi.
«Qazir janar-jaǵarmaı salasynda qyzý jumys júrip jatyr. Pavlodar munaı óńdeý zaýyty 40 kúnge jóndeý jumystaryn josparlap otyr. Osy oraıda dızel otyny men A-95 benzıniniń qajetti qory qalyptastyryldy. Ákimdiktermen birlesip qajet kólemdegi benzın jáne dızelmen qamtý boıynsha reıdter júrgiziledi», - dedi Almasadam Sátqalıev Úkimet otyrysynan keıin jýrnalısterdiń saýalyna jaýap bere turyp.
Mınıstrdiń aıtýynsha, kúzgi egin jınaý maýsymyna daıyndyq erte qolǵa alynady.
«Qyrkúıek aıynyń basynda Atyraý munaı óńdeý zaýytyn jóndeý josparlanýda. Sondyqtan otandyq munaı óńdeý zaýyttarynda munaı ónimderin turaqty óndirýmen qatar, ımporttyń qajetti kólemin qamtamasyz etý qajet», - deıdi ol.