Pavlodar munaı-hımııa zaýyty jóndeýge jabylady

<p>PAVLODAR. KAZINFORM - &laquo;QazMunaıGaz&raquo; ulttyq kompanııasynyń basshylyǵy josparly jóndeý jumystary bir aıǵa sozylatynyn málimdedi. Elimizde jınaqtalǵan munaı ónimderiniń qory ishki naryqty qamtamasyz etýge jetkilikti deıdi kompanııa mamandary.</p>

Osy jyldyń alǵashqy 5 aıynda PMHZ shamamen 2,5 mln tonna shıkizatty qaıta óńdep, shamamen 730 myń tonna benzın, 807 myń tonna dızel óndirdi. Bıtým boıynsha óndiris kólemi 130 myń tonna, mazýt boıynsha 217 myń tonna, suıytylǵan gaz boıynsha 147 myń tonna, avıaotyn boıynsha 113 myń tonna boldy. Zaýyt kóptegen kórsetkish boıynsha jospardy asyra oryndady. 

Foto: «QazMunaıGaz» kompanııasy

«PMHZ-nyń turaqty jáne senimdi atqaratyn qyzmeti ishki naryqty áleýmettik mańyzdy munaı ónimderimen qamtamasyz etýde sheshýshi ról atqarady. Qaýipsizdik tehnıkasy talaptarynyń barlyq normasyn saqtaı otyryp, 2024 jylǵy josparly aldyn alý jumystaryn bekitilgen merzimde sapaly júrgizýdi qamtamasyz etý qajet», - dep atap ótti «QazMunaıGaz» UK AQ basqarma tóraǵasy Ashat Hasenov jóndeýdi merziminen buryn aıaqtaý múmkindigin qarastyrýdy tapsyra otyryp.

Jóndeý jumystary 17 maýsymnan bastalady. Boljam boıynsha, elimizdegi mol janar-jaǵarmaı qorynyń qalyptasýyna baılanysty zaýyttyń ýaqytsha toqtaýy óńirlerdi munaı ónimderimen qamtamasyz etýge áser etpeıdi. 

Foto: «QazMunaıGaz» kompanııasy

Eske sala keteıik, Aqtaýda quny 66 mln AQSh dollary bolatyn munaı termınaly memleket menshigine qaıtaryldy .

Foto: «QazMunaıGaz» kompanııasy