Pavlodar: qarttar úıiniń qyzmetkeri qarııalar zeınetaqysyn jymqyrǵan

<p>PAVLODAR. KAZINFORM - Medbıke qarttar úıin panalap otyrǵan zeınetkerlerdiń esepshotynan jalpy somasy 250 myń teńge sheship alǵan. Qos qarııaǵa keltirilgen zalal tolyq óteldi.</p>

Pavlodar qalasyndaǵy qarttar úıinde eki birdeı qarııanyń zeınetaqysynan qomaqty aqsha jymqyrǵan medbıkeniń isi áshkere boldy. 24 jasar áıel adam qarııalardyń ańqaýlyǵyn paıdalanyp, olardyń senimine kirgen. Qarttardyń banktik kartalaryn alyp, jalpy somasy 250 myń teńge aqsha sheship alǵan.

Polıtsııa zardap shegýshilerdiń shaǵymy boıynsha qylmystyq is qozǵap, ony sotqa joldaǵan. Medbıkeniń isi Pavlodar qalasynyń №2 sotynda qaralyp, sheshim jyldam shyqty. Sot zardap shegýshilerdiń shyǵyny ótelgenin jáne taraptardyń sotqa deıin tatýlasqanyn eskere otyryp, mekeme qyzmetkerin jaýapkershilikten bosatty.

«Sotqa deıingi tergeý barysynda zardap shegýshiler aıyptalýshymen ózara tatýlasqany sebepti isti toqtatý týraly jazbasha ótinish túsirdi. Shyǵyn tolyq óteldi. Qarttardyń aıyptalýshyǵa eshqandaı talaby joq. Qylmystyq istiń quqyqtyq saldary týraly taraptarǵa túsindirildi», - delingen №2 qalalyq sottyń habarlamasynda.