Pavlodarda 12600 dollar kólemindegi jalǵan aqshany saýdalaǵan adam sottaldy

<p>PAVLODAR. KAZINFORM - Pavlodar qalasynda jalǵan aqsha saýdalaǵan azamat sottaldy. Ol valıýta aıyrbastaýmen aınalysatyn azamatqa 12600 AQSh dollary kólemindegi jalǵan aqshany satyp jibergen. Sot turǵyndy 5 jyl 6 aıǵa bas bostandyǵynan aıyrdy.</p>

«Azamat qalanyń aıyrbastaý pýnktterinde jalǵan kýpıýralardy satýǵa tyrysqan. Biraq kassır banknottardy qabyldaýdan bas tartqannan keıin valıýta aıyrbastaýmen aınalysqan áldebir adamǵa 12600 AQSh dollary kóleminde jalǵan aqsha satqan», - dep habarlady Pavlodar oblysy boıynsha ekonomıkalyk tergep-tekserý departamentinen.

Atalǵan fakti boıynsha Qarjylyq monıtorıng agenttiginiń Pavlodar oblysy boıynsha departamenti tergeý júrgizgen.

Sot Pavlodar turǵynyn kináli dep tanyp, 5 jyl 6 aıǵa bas bostandyǵynan aıyrý jazasyn taǵaıyndady.

Qarjylyq monıtorıng agenttigi azamattardy saqtyq tanytyp, qolma-qol aqshany muqııat sanaýǵa shaqyrady.