Pavlodar qalalyq aýrýhanasynda sońǵy kovıd bólimi jabyldy
Oblys ortalyǵyndaǵy №3 aýrýhana ádettegi jumysyna qaıta oraldy. Oblystyq densaýlyq saqtaý basqarmasynyń málimetinshe, emdeý mekemesinde 337 tósek-oryn bar.
- Aýrýhanadaǵy kovıd bólimi 2020 jyldyń 14 sáýirinen bastap jumys istedi. Osy ýaqyt ishinde munda COVID-19 juqtyrǵan 7 758 naýqas emdeldi. 3 876 naýqastyń jaǵdaıy aýyr boldy. 103 adam kóz jumdy, - dedi basqarmada.
Josparly emdeý úshin №3 qalalyq aýrýhananyń endokrınologııa, nevrologııa, sondaı-aq neıro jáne KVI-den keıingi ońaltý bólimderi patsıentterdi qabyldaýdy bastady.
Buǵan deıin №1 qalalyq aýrýhana, Sultanov atyndaǵy oblystyq aýrýhana jáne oblystyq kardıo ortalyq pandemııaǵa deıingideı kólemde josparly emdeý sharalaryn júrgizý maqsatynda patsıentterdi mekemege jatqyzýǵa kóshkeni habarlanǵan bolatyn.
COVID-19 juqtyrǵan naýqastar Pavlodar qalasyndaǵy modýldik aýrýhanaǵa, Ekibastuz qalalyq aýrýhanasyna qabyldanýda.
Eske salaıyq, ótken táýlikte oblysta koronavırýs ınfektsııasyn juqtyrýdyń jańa jaǵdaıy tirkelgen joq. Jalpy, pandemııa kezinde oblystyń 78 017 turǵynynda koronavırýs anyqtaldy.