Pavlodar dúkenderinde baǵasy arzan áleýmettik kókónisti halyq nege almaıdy

PAVLODAR. QazAqparat - Pavlodar oblysynyń dúkenderine jetkiziletin áleýmettik kókónisterdiń sapasy jóneltý kezinde tekseriledi, dep habarlaıdy QazAqparat.

Pavlodar oblysynyń ákimi Ábilqaıyr Sqaqov birneshe áleýmettik dúkenderdi aralaǵannan keıin osyndaı tapsyrma berdi.

Aımaq basshysy jergilikti óndirýshilermen memorandým aıasynda saýda oryndaryna sapaly kartop pen sábiz ákele bermeıtinine kóz jetkizdi.

Ákim jýyrda agrarıılermen kezdesýden keıin áleýmettik dúkenderdi aralaýdy jón kórdi.

Osy kezdesýde tórt aı ishinde ishki naryqty toltyrý úshin salynǵan 36 myń tonna arzandatylǵan kókónistiń tek 10%-y Pavlodar oblysynda satyldy dep esepteldi.

Alǵashqy saýda núktesinde – Kataev kóshesindegi «Provıant» dúkeninde Ábilqaıyr Sqaqov nelikten bulaı bolǵanyn anyqtady.

Áleýmettik sóredegi barlyq kartop pen sábiz bári birdeı sapaly bolmaǵandyqtan, satyp alýshylar kóbine kókónisterdi qymbatyraq baǵamen satyp alýdy jón kóredi.

- «Gagarındik» kartoptyń kelisi 200 teńgeden bas tartsam, tutynýshylarymnyń jartysynan aıyrylyp qalýym múmkin, – deıdi kókónis bóliminiń satýshysy. – Onyń sapasy da, dámi de áleýmettik kókónisterden erekshe deıdi.

Aımaq basshysy sol kókónisterdiń kelisi 115 teńgeden satylyp jatqanda, turǵyndardyń kartop pen sábizdi nelikten 60-70 paıyzǵa qymbatqa túsetinin anyqtaý úshin áleýmettik dúkenderdi satyp alýshylar arasynda saýalnama júrgizýdi tapsyrdy.

Ákimniń un tartýshylary men naýbaıshylarǵa jasalǵan memorandým aıasynda jetkiziletin áleýmettik nanǵa da qatysty shaǵymdary boldy.

Bekitilgen 95 teńgelik nannyń salmaǵy 550 gramm bolýy kerek. Alaıda, saýda núktesindegi tarazylar 495 grammdy kórsetti.

Lomov kóshesindegi «Danııa» dúkeninde áleýmettik kartop pen sábizden basqa satylmady.

Satýshylar moıyndaǵandaı, turǵyndar tikeleı jergilikti óndirýshilerden jetkiziletin kókónisterdi óz yqylastarymen satyp alady jáne olardyń sapasyna shaǵymdanbaıdy.

Sondaı-aq, kásipkerler oblystyq turaqtandyrý qorynan alatyn qant, ósimdik maıy, kúrish pen qaraqumyqty qala turǵyndary arzanyraq alyp jatyr.

- Bizdiń negizgi tutynýshylarymyz – zeınetkerler, - dedi dúken menedjeri. – Áleýmettik taýarlardy da satyp alady. Olar úshin bul jaqsy kómek.

Turaqtandyrý qorynyń ónimderi «Pahomovskıı» sýpermarketinde de qabyldanady.

Dúken menedjeri tipti jetkizilim kólemin kóbeıtýdi surady, óıtkeni arzan azyq-túlik óte tez satylyp ketedi.

Bul jerde, aıtpaqshy, qalypta pisirilgen nannyń salmaǵy standartqa saı boldy, al áleýmettik orama baǵasy memorandýmda belgilengennen de tómen bolyp shyqty – 89 teńge.

Aralaý qorytyndysy boıynsha Ábilqaıyr Sqaqov áleýmettik kartop pen sábizdi dúkenderge jóneltý kezinde baqylaý ornatýdy talap etti.

Óńir basshysy kókónisterdi saýda oryndarynda qabyldaý kezinde olardyń sapasyn tekserýdi de tapsyrdy.

Ol otandyq taýar óndirýshiler sapaly ónim jetkizý boıynsha mindettemeler alǵanyn jáne ony oryndaýy kerektigin eske saldy.

Oblys ákimi fermerlerge qoımalardan qandaı kartop pen sábiz tıeletinin ózderi qarap, halyqtyń sapasyna degen narazylyqtarynyń orynde ekendigine kóz jetkizýdi usyndy.