Pavel Kazantsev: Qazaq tiliniń aıasy májbúrleýsiz keńeıip jatyr

NUR-SULTAN. QazAqparat – QR Parlamenti Májilisi Tóraǵasynyń orynbasary Pavel Kazantsev Qazaqstandaǵy tildik ahýal týraly pikir bildirdi, dep habarlaıdy QazAqparat tilshisi.

Májilis Tóraǵasy orynbasarynyń aıtýynsha, Qazaqstanda til erkindigi boıynsha eshqandaı problema joq. Bul oıyn ol Facebook-tegi paraqshasynda jazdy.

«Sońǵy kezde jıi talqylanyp jatqan ultaralyq kelisim, til máseleleri týraly oıymdy ortaǵa tastaǵym keledi. Bizdiń elde bul turǵyda problema joq. Túrli ult ókilderi árdaıym bir-birimen beıbit ómir súrip kele jatyr. Ózara túsinisý boıynsha eshqashan problema bolǵan joq. Qazaq tili aıasyn keńeıtip keledi. Túrli ult ókilderi úshin bul ómirdiń ajyramas bóligine aınalyp otyr. Ulty basqa qazaqstandyqtardyń qazaq tilinde erkin sóıleýi qazir eshkimge tańsyq emes. Munyń bári evolıýtsııalyq jolmen, májbúrleýsiz júrip jatyr», - dep jazdy depýtat.

Sondaı-aq, ol arakidik bolatyn jekelegen jaǵdaılarǵa qarap Qazaqstandaǵy tildik ahýalǵa baǵa berýge bolmaıtynyn eske saldy.

«Qazaqstandaǵy etnosaralyq jaǵdaıǵa tym qatty alańdap otyrǵandardyń bárine aıtqym keledi. Jekelegen jaǵdaılar mundaǵy tutas ahýaldy sıpattaı almaıdy. Biz buǵan deıin de kelisimde ómir súrdik jáne solaı ómir súre beremiz!», - dep túıindedi Pavel Kazantsev.