Pavel Dýrov on jylǵa bas bostandyǵynan aıyrylýy múmkin

<p>ASTANA. KAZINFORM &ndash; Telegram servısiniń negizin qalaýshy Pavel Dýrov birneshe quqyqbuzýshylyq jasaǵany úshin, sonyń ishinde uıymdasqan toptyń zańsyz tranzaktsııalaryn jasaýǵa múmkindik beretin onlaın platformany basqarǵany úshin on jylǵa bas bostandyǵynan aıyrylýy múmkin.</p>

Sársenbi kúni Pavel Dýrovqa uıymdasqan toptyń zańsyz tranzaktsııa júzege asyrý maqsatynda Telegram-dy ákimshilinderýge qatysy bar degen aıyp taǵyldy. Oǵan barlyǵy alty qylmys boıynsha aıyp taǵylyp otyr. Aıyptar jıyntyǵy boıynsha kásipker 10 jylǵa deıin bas bostandyǵynan aıyrylýy múmkin.

P.Dýrov sottyń qadaǵalaýymen bosatyldy. Degenmen, oǵan Frantsııa aýmaǵynan shyǵýǵa tyıym salynyp, kepil retinde 5 mln eýro tóleýi kerek.

Parıj soty ony aptasyna eki ret polıtsııa bólimshesine kelýge mindettedi.

Frantsýz aqparat quraldarynyń habarlaýynsha, Pavel Dýrov 24 tamyzda Parıjdiń Le Býrje áýejaıynda balalarǵa qarsy qylmysqa, esirtki saýdasyna jáne alaıaqtyqqa qatysy bar degen aıyppen ustalǵan.

Ilon Mask Dýrovtyń ustalýyn sóz bostandyǵyna kepildik beretin AQSh Konstıtýtsııasyna engizilgen birinshi túzetýdiń «jarnamasy» dep atady.

Al Telegram komandasy platformadaǵy qııanat týraly aıyptaýlardyń aqylǵa qonymsyz ekenin aıtty.

Eýropalyq Politico basylymy Frantsııada Telegram negizin qalaýshy Pavel Dýrovtyń aǵasy Nıkolaı Dýrovqa da izdeý jarııalanǵanyn habarlady.