«Patrıot» realıtı shoýynyń jeńimpazy anyqtaldy
Sharshy alańda qarsylastaryn shań qaptyrǵan Mıras - Taldyqorǵan qalasyndaǵy polıtehnıkalyq kolledjdiń 4-kýrs stýdenti. Dene tárbıesiniń bolashaq muǵalimi 10 jasynan bastap bokspen aınalysyp keledi. 20 jastaǵy jigit AQSh-tyń Las Vegas qalasyndaǵy Freddı Roýchtyń zalynda jattyǵýǵa múmkindik aldy. Ol jerde jeńimpaz eń myqty boks sheberlerinen tálim alatyn bolady.
Al ekinshi oryndy Raıymbek aýdanynyń týmasy Jaqsylyq Qyrǵyzáli, úshinshi oryndy Sarqan aýdanynyń namysyn qorǵaǵan Saıat Qudaıbergen jeńip aldy.
Jetisý jerinde «Patrıot» realıtı shoýy tuńǵysh ret uıymdastyrylyp otyr. Elbasynyń «Rýhanı jańǵyrý: bolashaqqa baǵdar» baǵdarlamalyq maqalasy aıasynda júzege asqan aýqymdy dodanyń maqsaty jastardy sportqa baýlyp, salaýatty ómir saltyn nasıhattaý. Túrli jat áreketterden olardyń boıyn aýlaq ustaý. Jalpy saıysqa Almaty oblysynyń aýdan, qalalarynan 16 sportshy qatysty.
«Eki aptanyń ishinde eń myqtylary irikteldi. Olar osy ýaqyt aralyǵynda Taldyqorǵannyń kórikti jerlerimen tanysyp, aǵylshyn tilin oqydy. Dombyra shertip, rýhanı jańǵyrdy. Aıta ketý kerek, bul qatysýshylardyń barlyǵy kásibı sport sheberleri emes, áýesqoı sportshylar», - dedi joba uıymdastyrýshysy, oblystyq Іshki saıasat basqarmasynyń basshysy Rýstam Alpysbaev.
Óte joǵary deńgeıde uıymdastyrylǵan shara kórermender úshin de qyzyqqa toly boldy. Olar túrli oıyndarǵa qatysyp, biri Túrkııa eline joldamany utyp aldy. Aıta ketý kerek, «Patrıot» realıtı shoýy 18-22 jas aralyǵyndaǵy jastar arasynda uıymdastyryldy. Bolashaqta bul báseke dástúrli túrde ótedi dep josparlanýda.