Patogendermen jumys isteıtin mamandardyń aılyǵyn 50 paıyzǵa kóterý usynyldy

NUR-SULTAN. QazAqparat –QR Densaýlyq saqtaý vıtse-mınıstri – Bas sanıtar dáriger Erlan Qııasov patogendermen jumys isteıtin mamandardyń aılyǵyn 50%-ǵa kóterýdi usyndy. Bul týraly ol «Qazaqstan Respýblıkasynyń bıologııalyq qaýipsizdigi týraly» zań jobasyn Májilis depýtattaryna tanystyrý kezinde aıtty, dep habarlaıdy QazAqparat tilshisi.

Erlan Qııasovtyń sózinshe, Zań jobasynda 2022-2024 jyldar aralyǵynda jalpy somasy 25 mlrd teńgeden asatyn shyǵystar kózdelgen. Sonyń ishinde negizgi úsh beıindi vedomstvo – Densaýlyq saqtaý mınıstrligine – 23,4 mlrd teńge, Aýyl sharýashylyǵy mınıstrligine – 1,1 mlrd teńge, Bilim jáne ǵylym mınıstrligine – 1,1 mlrd teńge qarastyrylǵan.

«Bul qarajattyń ishinde 10,9 mlrd teńge qaýipti patogendermen jumys isteıtin mamandardyń aılyǵyn 50%-ǵa kóterý, ústemeaqy tóleý, 2 laýazymdyq eńbekaqy mólsherinde saýyqtyrýǵa arnalǵan járdemaqy berý, bıoqaýipsizdik salasyndaǵy mamandardyń biliktiligin arttyrý jáne qaıta daıarlaý máselelerine baǵyttalady», - dedi Bas sanıtar dáriger.