Páterler ıeleriniń kooperatıvteri qalaı qosymsha tabys tabady

NUR-SULTAN. QazAqparat – QR Indýstrııa jáne ınfraqurylymdyq damý mınıstrligi qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Erkebulan Daýylbaev kóppáterli turǵyn úılerden qosymsha tabys tabý joldaryn túsindirdi, dep habarlaıdy QazAqparat tilshisi.

«Іs júzinde páterler ıeleriniń kooperatıvteriniń, basqarýshy kompanııalardyń basshylary jáne kóppáterli turǵyn úılerdi basqarýmen aınalysatyn basqa da tulǵalar, paıdalanýdaǵy ortaq múliktiń jekelegen bólikterin jalǵa nemese paıdalanýǵa berý arqyly qosymsha tabys taba alady. Muny páterlerdiń, turǵyn emes úı-jaılardyń menshik ıeleri bilmeýi múmkin. Sondyqtan páter, turǵyn emes úı-jaılar ıeleri, jańadan qurylǵan múlik ıeleri birlestikteri men jaı seriktestikter kóppáterli turǵyn úıdiń qandaı tabys pen paıda ákeletinin bilýi mańyzdy», - dedi E. Daýylbaev Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, tabystyń negizgi kózderi – jarnama, jabdyqtardy ornatý jáne úı-jaılardy jalǵa berý.

«Osylaısha, lıftidegi jáne úı syrtyndaǵy jarnamalar, tóbede ornatylǵan antenna nemese basqa jabdyqtar kóppáterli turǵyn úıdiń qosymsha tabysy bola alady. Qosymsha kirister kondomınıým obektisiniń ortaq múlkin basqarýǵa jáne kútip-ustaýǵa jumsalýy tıis jáne bul týraly aqparat árbir turǵynǵa beriletin aı saıynǵy esepte kórsetilýi qajet.

Basqarýdyń jańa formalaryn engizý árbir kóppáterli turǵyn úıdegi páter ıeleriniń, turǵyn emes úı-jaılardyń múddelerin qorǵaýǵa, kondomınıým obektisiniń ortaq múlkin kútip-ustaý sapasynyń deńgeıin arttyrýǵa múmkindik beredi, bul tutastaı alǵanda turǵyn úı qorynyń saqtalýyn qamtamasyz etedi», - dedi Erkebulan Daýylbaev.

Aıta keteıik, 2020 jyldyń basynan bastap «Keıbir zańnamalyq aktilerge turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly» QR Zańy kúshine endi. Bıylǵy 22 aqpandaǵy jaǵdaı boıynsha kóppáterli turǵyn úıdi basqarý boıynsha 1 735 uıym qurylǵan.

Basqarýdyń eski formalary 2022 jyldyń 1 shildesine deıin óz qyzmetin jalǵastyrady. Osy merzim aıaqtalǵan soń Qazaqstan Respýblıkasynyń zańnamasynda belgilengen tártippen joıý rásimin júrgizýi tıis.

Buǵan deıin Erkebulan Daýylbaev basqarýdyń jańa formalaryna kóshý algorıtmin jáne múlik ıeleri birlestigin qurýdyń artyqshylyqtaryn túsindirgen edi.