«Páterin jalǵa berýshiler kúnine qansha paıda tabady?» - respýblıkalyq basylymdarǵa sholý

ASTANA. 14 tamyz. QazAqparat - Qazaq aqparat agenttigi respýblıkalyq basylymdarda 14 tamyz, seısenbi kúni shyqqan ózekti materıaldarǵa sholýdy usynady.

«Egemen Qazaqstan» búgingi sanynda «Ejelden er degen Dańqymyz shyqty ǵoı. Namysyn bermegen Qazaǵym myqty ǵoı!» atty maqalasynda kúni keshe shymyldyǵy ja­byl­ǵan London Olımpıadasyndaǵy Qazaqstannyń jetistigi jaıynda sóz qozǵaıdy.

Maqalada atap kórsetilgenindeı, Ulybrıtanııa astanasynyń tórinde osy kún­deri elimizdiń ánurany - «Meniń Qazaqstanym» naǵyz tańdaýly áýenge aınalyp úlgergen.

«Qazaqstan bul Olımpıadada ózi mejelegen 13 medaldi túgel aldy. Biraq, bastaǵy joba 3 altyn medal edi, saıypqyran­dary­myz bul beldeýdi eki eseden de astam bıikke kóterip, baǵaly metall mólsherin jeteýge jetkizdi. Atam qazaq úshin jeti sany qashannan kıeli sanalǵan. Endeshe, óz ıesi bar kıeli Qazaq jurty sol qasıetti deńgeıden kórindi. Osy altyn medaldary arqyly olımpıadashylarymyz tarıhta tuńǵysh ret 12-orynǵa kóterildi», - dep jazady basylym.

Sonymen qatar osy kúni joǵary oqý oryndaryna taǵaıyndalǵan granttardyń ıegerleri anyqtalǵandyǵy týraly habarlanýda. 2012 jylǵy bilim berý granttary ıegerleriniń tizimin «Egemen Qazaqstan» gazetiniń betterinen taba alasyzdar.

Al «Aıqyn» gazeti «Páterin jalǵa berýshiler kúnine qansha paıda tabady?» degen saýalǵa jaýap izdep kórgen. «Sonymen, Almatydaı alyp shaharda páterdi jalǵa berýshiler bir aıda qansha paıda tabady? Osy máseleni zerdeleý maqsatynda biz ózimizshe «reıd» uıymdastyryp, máseleniń anyq-qanyǵyna kóz jetkizýge tyrystyq», - delingen maqalada.

«Alash aınasy» gazeti óziniń «Rekord jańartýda úzdikter qataryndamyz» dep atalatyn maqalasynda Qazaqstan qorjynyna júlde salǵan sportshylardyń jetistigi men jalpy komandalyq eseptegi elimizdiń joǵary oryndarǵa qol jetkizgendigin aıta kele, Tumandy Albıon tórinde jańartqan rekordtarymyzdy sanap kórgen.

«Mine, qyzyq, kósh basynda Qazaqstannyń sportshysy tur - Ilıa Ilın. Bir ózi bes rekord jańartypty. Onyń ekeýi Olımpıada, úsheýi álem rekordtary», - deıdi.

Basylymnyń jazýynsha, Svetlana Podobedova, Zúlfııa Chınshanlo, Maııa Maneza qol jetkizgen tolaǵaılardyń arqasynda rekordtar sany boıynsha jalpykomandalyq esepte tórttiktiń qataryna oıyp turyp oryn alyppyz.

Shyǵys Qazaqstan oblysynyń shalǵaı aýdandary men aýyldarynda jylý berý maýsymyna daıyndyq sharalaryn pysyqtaý jáne esep berý jıyndary bastaldy. ShQO ákimi Berdibek Saparbaevtyń aldynda eń alǵashqylardyń biri bolyp Glýbokoe aýdanynynyń ákimi esep berdi, dep jazady «Kazahstanskaıa pravda» gazeti «Aýyl adamdarynda tennıs alańy bolady» atty maqalasynda. («Býdet ý selchan tennısnyı kort»).

Gazettiń atap ótýinshe, atalmysh aýdanǵa qarasty Sekısov aýyldyq okrýginde jańa sý toǵany salynyp bitýge jaqyn. Árbiriniń tereńdigi  40 metr bolatyn eki sý uńǵymasy paıdalanýǵa jaz aıynyń sońynda bolmaq jáne eldimeken turǵyndaryn taza sýmen qamtamasyz etpek. Sonymen qatar qurylysshylar tamyz aıynyń sońyna deıin aýylda tennıs kortyn salyp bitýdi josparlaýda. «Onda zamanaýı jattyǵý zaldary da bolady», - dep atap ótedi basylym.