Páter jaldap turatyn 90 jastaǵy túrkistandyq keıýana úıli boldy

TÚRKІSTAN. QazAqparat- Páter jaldap turatyn 90 jastaǵy túrkistandyq keıýana baspanaly boldy, dep habarlaıdy QazAqparat tilshisi.

Túrkistan qalasynyń turǵyny Rabııa Tórebaeva 90 jasqa tolǵan shaǵynda turǵyn úıge qol jetkizdi.

Búginge deıin páter jaldap, kúneltip kelgen keıýanaǵa qaıyrymdy jandar qarajat jınap, jańa móltek aýdannan 2 bólmeli páter alyp berdi.

Igi iske qalalyq aqsaqaldar alqasy uıytqy bolǵan.

«Bizge kelgen jalǵyzbasty ana jaǵdaıyn aıtyp, kómek surady. Úrim-butaǵy joq eken. 65 jyldan beri páter jaldap, kúneltip kelgen. Aqsaqaldar alqasynyń músheleri uıymdasa otyryp qarjy jınadyq. Demeýshiler izdedik. Nátıjesinde jańa qaladan 2 bólmeli páter alyp berdik»,-deıdi qalalyq aqsaqaldar alqasynyń tóraǵasy Kishibaı Jumadilda.

Úıdiń kiltin alyp, kóńili qýanyshqa kenelgen keıýana ıgi iske úles qosqan jandarǵa alǵysyn jetkizdi.

Zamandastary án shyrqap, syılyq tabystady. Lenta qıyp, qonystoıǵa qutty bolsyn aıtty.