Páter ıesi jalǵa alýshydan depozıt suraýy qanshalyqty zańdy - maman jaýaby

ALMATY. QazAqparat – Eger kepildik tólem bolsa, ony qalaı qaıtarýǵa jáne qandaı jaǵdaıda paıdalanýǵa bolady? Bul saýaldarǵa onlaın brıfıng barysynda Qazaqstan birikken rıeltorlar qaýymdastyǵynyń múshesi Orynbasar Sataev jaýap berdi, dep habarlaıdy QazAqparat tilshisi.

Spıkerdiń sózinshi, jalǵa alýshylar aldymen mynany túsinýi kerek. Aldyn ala tólem basqa, depozıt - basqa tólem.

«Árıne, jazbasha kelisimsharttyń bolýy eki tarapty da qorǵaıdy. Kelisim-sharttyń parıtettik bolýyn qamtamasyz etýge, onyń árbir tarap úshin teń quqyqtar men mindetterge ıe bolýyna umtylý qajet. Kepildik tólem (depozıt) eki jaqtyń kelisimine baılanysty jasalady. Kóbine onyń somasy jalǵa beriletin páterdiń bir aılyq aqysy mólsherinde bolady. Sonymen qatar, páterdiń turǵan jerine, ishindegi jıhazǵa tikeleı baılanysty. Meniń oıymsha kepildik tólem bolýy kerek. Mysaly, jalǵa alýshy kommýnaldyq shyǵyndy tólemese, qymbat jıhazdy búldirse páter ıesi sol somadan ustap qalýǵa quqyly. Eger jalǵa alýshymen kelisim shart toqtatylsa jáne bári durys bolsa menshik ıesi depozıtti qaıtarýǵa mindetti», - dedi ol.

Aıtýynsha, páterdi jalǵa alýshylardyń basym bóligi aldyn ala tólem jasaıdy. Ózderine unaǵan baspanada uzaq ýaqyt turaqtap qalý úshin alty nemese bir jylǵa deıin tólep tastaıdy. Bul da kelisim shartta kórsetiledi.