Parlamenttik tyńdaý: Veterınarııalyq mamandyqtar granttarynyń quny kóterilýi kerek
«Biz salanyń aldyna aýqymdy mindetter qoıa otyryp, olardyń tikeleı aýylda iske asyrylatynyn túsinýge tıispiz. Al buǵan bizdiń eńbek resýrstarymyz jete me? Osyǵan baılanysty, aýyldyq aýmaqtardy damytý jáne aýyl turǵyndarynyń áleýmettik ómir súrý jaǵdaılaryn ózgertý úshin Elbasynyń tapsyrmasy boıynsha «Aýyl - el besigi» dep atalatyn arnaıy joba ázirlendi. Áıtse de, qazirgi tańda óńirlerdiń damý baǵdarlamalaryna tıisti ózgerister engizilmedi jáne bul joba tolyqtaı jumys istep turǵan joq. Jas otbasylardy turǵyn úımen qamtamasyz etý máselesi de ótkir sıpat alyp otyr. «Dıplommen - aýylǵa!» baǵdarlamasy bul máseleni túbegeıli túrde sheshe almaıdy. Osyǵan baılanysty «7-20-25» baǵdarlamasynyń kúshin aýyldyq eldi mekenderge de qoldaný qajet», - dedi Májilistiń Agrarlyq máseleler komıtetiniń tóraǵasy B. Ospanov.
Onyń sózine qaraǵanda, sala úshin mamandardy bilimi boıynsha sapaly túrde daıarlaý da úlken mańyzǵa ıe. Ony bilim berý baǵdarlamalaryn álemdik standarttar men zamanaýı agrotehnologııalar negizinde jańǵyrtý jolymen júzege asyrý qajet. Ol úshin agrarlyq joǵary oqý oryndary men aýyl sharýashylyǵy ǵylymı uıymdarynyń materıaldyq-tehnıkalyq bazasynyń jańartylýyn qarjylandyrýdy qamtamasyz etý, oqytýshylardyń biliktiligin arttyrý kerek.
«Jergilikti atqarýshy organdardyń «Dıplommen - aýylǵa!» baǵdarlamasynyń talaptaryn oryndaý jónindegi jumysy erekshe baqylaýǵa alynyp, onyń kórsetkishteri ákimder qyzmetiniń reıtıngine engizilý kerek. Joǵary oqý oryndary úshin veterınarııalyq mamandyqtar boıynsha granttar quny ulttyq ýnıversıtetter deńgeıine jetkizilý qajet, bul olardy daıarlaý sapasyn jaqsartýǵa múmkindik beredi. Sonymen qatar aýyl sharýashylyǵy óndirisiniń suranysyna baǵdarlanǵan ǵylymı zertteýlerge arnalǵan shyǵystardy qarjylandyrýdy da birneshe ese kóbeıtý kerek», - dedi Berik Ospanov.