Parlamentte úsh jańa partııa: Olardyń arasynda oppozıtsııalyq JDSP bar

ASTANA. QazAqparat – Saılaý nátıjesi boıynsha Parlament Májilisine alty partııa ótedi, onyń ishinde úsh partııa alǵash ret Májiliste boı kórsetedi. Olar – «Aýyl» halyqtyq-demokratııalyq partııasy, «Respublica» partııasy jáne parlamenttegi alǵashqy oppozıtsııalyq partııa Jalpyulttyq sotsıal-demokratııalyq partııa, dep habarlaıdy QazAqparat tilshisi.

Jalpyulttyq sotsıal-demokratııalyq partııa 2006 jyly 10 qyrkúıekte bár top el azamattarynyń bastamasymen qurylǵan jáne 2007 jyly 25 qańtarda tirkelgen. Elimizdiń barlyq oblystarynda jáne Astana, Shymkent jáne Almaty qalalarynda partııanyń fılıaldary bar. JSDP tóraǵasy – Azat Rahymjanov.

Partııanyń qyzmeti eriktilik, teńdik, ózin-ózi basqarý, zańdylyq jáne jarııalyq qaǵıdattaryna negizdelgen. Partııa qoldanystaǵy zańnamada belgilengen shekteýlerdi qospaǵanda, óziniń ishki qurylymyn, maqsattaryn, mindetterin, qyzmet nysandary men ádisterin derbes anyqtaıdy.

Ótken jyly JSDP partııasynyń kandıdaty Prezıdent saılaýyna qatysqan edi. Sol kezde partııa Nurlan Áýesbaevtyń kandıdatýrasyn usyndy. Saılaý qorytyndysy boıynsha oǵan 176 116 adam nemese saılaýshylardyń 2,22% daýys bergen.

«Aýyl» halyqtyq-demokratııalyq patrıottyq partııasy 2015 jyly 5 qyrkúıekte «Aýyl» qazaqstandyq sotsıal-demokratııalyq partııasy men Qazaqstan patrıottary partııasynyń birigýi arqyly qurylǵan. Partııa tóraǵasy – QR Parlamenti Senatynyń depýtaty Álı Bektaev.

Partııa qyzmetiniń basty ózegi aýyl, agroónerkásiptik keshen problemalaryn, aýyl halqyn áleýmettik qamsyzdandyrý máselelerin sheshý boldy jáne osylaı qala beredi. «Aýyl» partııasy da óz kandıdaty Jıgýlı Daırabaevty Prezıdenttikke usynǵan edi. Onda «Aýyl» kandıdatyna 271 641 saılaýshy nemese 3,42% daýys berdi.

Saılaý aldynda partııa qataryna QR Prezıdenttigine kandıdat bolǵan Qaraqat Ábden de qosyldy. Ótken jyly saılaýda Qaraqat Ábdenge 206 000 nemese saılaýshylardyń 2,6% senim bildirgen.

«Respublica» partııasy bıyl 18 qańtarda quryldy. Partııa tóraǵasy – Aıdarbek Qojanazarov.

«Respublica» partııasy zamanaýı jáne joǵary tehnologııalyq ulttyq ekojúıeni qurý bastamasyn kóterdi. Partııa ózin qoǵamdyq ómirdiń barlyq salalarynda qurylymdyq ózgeristerge baǵyttalǵan META-partııa retinde kórsetedi.

Partııa ókilderi senimdi, gúldengen jáne ádil memlekette – árkim adal eńbek etip, laıyqty tabys taba alatyn, deni saý jáne bilimdi jastary bar jáne óz elin maqtan tutatyn erkin adamdar elinde turǵysy keletinin aıtady

Buǵan deıin Ortalyq saılaý komıssııasy QR Parlament Májilisi depýtattarynyń kezekten tys saılaýynyń aldyn ala nátıjesin jarııalaǵan edi.