Parlamentte depýtattyq top quryldy «Bir el – Bir múdde»

ASTANA. QazAqparat - Senat Bıýrosynyń músheleri Memleket basshysynyń tapsyrmasy boıynsha qurylǵan «Bir el – Bir múdde» depýtattyq tobyn tirkeý máselesin qarady, dep habarlaıdy QazAqparat QR Parlament Senatynyń baspasóz qyzmetine silteme jasap.

Elimizdiń Prezıdenti Qazaqstan halqy Assambleıasynyń XXXII sessııasynda «Bir el – Bir múdde» depýtattyq tobyn qurý týraly bastama kótergen bolatyn. Memleket basshysy Qasym-Jomart Toqaev partııalardy ulttyq birlikti nyǵaıtý máselesine belsendi tartýda Parlamenttegi depýtattyq birlestik pármendi tetik bolýy múmkin ekenin jáne Assambleıadan saılanǵan bes senator onyń negizin quraı alatynyn atap ótken edi.

Elimizdegi qoǵamdyq kelisim men ulttyq birlik salasyndaǵy memlekettik saıasatty zańnamalyq turǵyda qamtamasyz etý máselesin kelisý – toptyń basty mindeti bolyp otyr. Jumystyń bul túri Parlament pen Qazaqstan halqy Assambleıasynyń ózara tıimdi is-qımylyna jáne azamattyq qoǵam ınstıtýttary arasyndaǵy etnosaralyq qatynastardy úılestirýge yqpal etetin bolady. Toptyń quramynda Parlamenttiń 30 depýtaty bar. Depýtattyq toptyń jetekshisi bolyp Senattyń Áleýmettik-mádenı damý jáne ǵylym jónindegi komıtetiniń tóraǵasy Nurtóre Júsip, Májilis depýtaty Natalıa Dementeva hatshysy bolyp saılandy.