Parlamentke bir mandatty depýtattyń qajeti joq - Perýashev pikiri
«Bul partııany álsiretýdiń joly ǵana. Meniń tájirıbemde bir mandatty okrýgten saılanǵan áriptesim boldy. Bul shoǵyrlanǵan daýys deńgeıiniń tómendeýine ákeldi. Árbir depýtat óz paıymynsha daýys berdi. Degenmen, bul júıeniń ózindik basymdyǵy da bar. Biraq, bul júıede partııalyq tizim qalyptastyrýdaǵy partııa róliniń quldyraýyna ákep soǵady. Men kerisinshe partııanyń rólin arttyrý qajet dep sanaımyn. Óıtkeni, sol kezde básekelestik týyndaıdy. Jekelegen depýtattyq quramda biz keıbir máseleler boıynsha daýlasa alamyz. Strategııalyq úlken baǵdarlamalar boıynsha daý týyndamaıdy. Búginde bizde bir úlken partııa men 2 parlamenttik azshylyq fraktsııa bar. Bizge óz ustanymyzdy qorǵaý ońaıǵa soqpaıdy. Al bir mandatty okrýg bolsa, onda bir partııa men qalǵandary jeke-jeke bolmaq», - dedi ol.
Sonymen qatar Perýashev BAQ ókilderiniń Parlament depýtattary tizimin saılaý ótkennen keıin emes oǵan deıin jasaqtaýǵa ne kedergi degen saýalyna da jaýap berdi.
«Saılaý bastalar kezde birde-bir partııa qansha mandatqa ıe bolatyndyǵyn bilmeıdi. Partııa mandat alǵannan keıin ǵana ony bóledi. Menim tizimimde kóptegen qurmetti adam bolýy múmkin. Biraq, men qurmetti adamdardan bólek túrli óńirdi nemese ekonomıka salalaryn biletin adamdardyń da bolǵanyn qalaımyn. Máselen, 4 adamnan mashına jasaý jáne bank salasynda, bir adamnan jeńil ónerkásip pen saýda salasynda myqty bolýy múmkin. Bank salasynda tórteýi de myqty bolsa da men jeńil ónerkásipten taǵy bireý alýym kerek», - dedi Perýashev.