Parlamentke arnaıy ekonomıkalyq aımaqtar týraly zań jobasy engizildi

ASTANA. QazAqparat - Elbasy aıqyndaǵan «Nurly jol» baǵdarlamasyn júzege asyrýǵa oraı, Parlamentke arnaıy ekonomıkalyq aımaqtar týraly zań jobasy kelip tústi. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Parlamenti Májilisiniń depýtaty, «Qazaqstan mashınajasaýshylar odaǵy» birlestiginiń basqarma tóraǵasy Meıram Pishembaev osylaı málim etti.

Depýtattyń aıtýynsha, «Nurly jol» baǵdarlamasy aıasynda ındýstrııalyq ınfraqurylymdy damytý baǵytynda qurylys materıaldarynyń, kólik jáne kommýnıkatsııa, energetıka, turǵyn úı-kommýnaldyq sharýashylyǵy salasyndaǵy ónimderdiń suranysy arta túsedi.

«Kóptegen salalar «qozǵalysta» bolyp, mýltıplıkatıvtik tıimdilik kóre bastaıtyndyqtan, qurylys materıaldaryna, metallǵa, tehnıka men jabdyqtarǵa suranys artady. Osyǵan oraı, Úkimetke elimizdiń óńirlerindegi arnaıy ekonomıkalyq aımaqtardy naqty jobalarmen tolyqtyrý týraly tapsyrmalar júktelgen. Onyń ishinde jańa ındýstrııalyq aımaqtardaǵy qurylys máselesi, shaǵyn jáne orta bıznesti damytý, qosymsha ınvestıtsııalar tartý sharalary qamtylatyn bolady. Osy máselelerdi keshendi sheshý úshin Úkimet «Qazaqstan Respýblıkasyndaǵy arnaıy ekonomıkalyq aımaqtar týraly» zańyna ózgerister men tolyqtyrýlar engizý týraly» zań jobasyn ázirlep otyr. Qazirgi tańda atalǵan qujat Parlament Májilisine engizilgen», - dedi depýtat M.Pishembaev.

Budan bólek, Májilis depýtaty Elbasynyń tapsyrmasyna sáıkes, ekonomıkany yntalandyrýdyń qurylymdyq ózgeristeri men ekonomıkalyq ósimniń ornyqty damýyn qamtamasyz etý maqsatynda Ulttyq qordan arnaıy qarajat tartylatynyn da atap ótti. Onyń sózine qaraǵanda, zańda aıqyndalǵan normaǵa sáıkes, Ulttyq qordan 2015-2017 jyldar aralyǵynda jyl saıyn 3 mlrd dollarǵa deıin bólinetin bolady.