Parlamentaralyq baılanystyń yntymaqtastyǵymyzdy nyǵaıtýda mańyzy zor - Erlan Qoshanov

BAKÝ. QazAqparat – Parlament Májilisiniń tóraǵasy Erlan Qoshanov Geıdar Álıevtiń 100 jyldyǵyna arnalǵan is-sharalarǵa qatysý úshin Ázerbaıjan Respýblıkasyna jumys saparymen keldi, dep habarlaıdy QazAqparat menshikti tilshisi palatanyń baspasóz qyzmetine silteme jasap.

Aıta keteıik, 16 mamyrda Bakýde Ázerbaıjan Respýblıkasy Mıllı Medjlısiniń Geıdar Álıevtiń 100 jyldyǵyna oraı arnaıy otyrysy ótti. Basqosýǵa 30-dan astam eldiń Parlament ókilderi, parlamentaralyq uıymdar, parlamentaralyq odaq, Arab Parlamenti, TúrkPA jáne Qara teńiz ekonomıkalyq yntymaqtastyǵy Parlamenttik Assambleıasynyń ókilderi qatysty.

Jıynda sóz sóılegen Erlan Qoshanov otyrysqa qatysýshylarǵa jáne barsha Ázerbaıjan halqyna Qazaqstan Prezıdenti Qasym-Jomart Toqaevtyń jyly lebizin jetikizdi. Sondaı-aq, Geıdar Álıevtiń Qazaqstan men Ázerbaıjan arasyndaǵy qarym-qatynastyń qalyptasýyndaǵy orasan zor róline nazar aýdardy.

«Qazaqstanda Geıdar Álıev bizdiń elge jáne qazaq halqyna degen shynaıy baýyrlastyq peıilimen belgili. Ol eki el arasyndaǵy berik dostyq qarym-qatynasty damytýǵa bar kúsh-jigerin jumsady. Geıdar Álıev árdaıym qazaq ulty týraly aıryqsha kózqarasta bolyp, túp-tamyrymyz ben ortaq baı rýhanı muralarymyz týraly aıtatyn», - dedi Májilis spıkeri.

Sondaı-aq, Erlan Qoshanov osy jyldyń sáýir aıynda Astana qalasynda ótken Geıdar Álıev atyndaǵy jańa kósheniń saltanatty ashylý rásimi týraly málimet berdi.

«Bul is-sharaǵa Qazaqstan men Ázerbaıjan kóshbasshylary Qasym-Jomart Toqaev pen Ilham Álıev qatysty. Kósheniń ashylý saltanatynda bizdiń Prezıdentimiz: «Geıdar Álıev sekildi álemdik deńgeıdegi tulǵanyń atyn ulyqtaý – bizdiń paryzymyz. Astanada onyń esimimen atalǵan jańa kósheniń ashylýy – bizdiń osy ıgi iske qosqan mańyzdy úlesimiz. Ázerbaıjan halqynyń uly perzentine degen zor iltıpatymyz ári shynaıy qurmetimiz» dep erekshe atap ótken bolatyn», - dedi Májilis tóraǵasy.

Erlan Qoshanov parlamentaralyq baılanys baýyrlas elderimizdiń jan-jaqty yntymaqtastyǵyn nyǵaıtýda mańyzdy oryn alatynyn aıtty. Ázerbaıjannyń Mıllı Medjlısiniń búgingi is-sharasy qazirgi qarym-qatynastardaǵy parlamenttik dıplomatııanyń róli erekshe ekenin kórsetedi.

Odan keıin Májilis tóraǵasy Ázerbaıjan Respýblıkasy Mıllı Medjlısiniń spıkeri Sahıba Gafarovamen kezdesti. Spıkerler Ilham Álıevtiń jaqynda Astanaǵa resmı sapary kezinde Qazaqstan men Ázerbaıjan basshylary qol jetkizgen ýaǵdalastyqtardy iske asyrýǵa eki el depýtattarynyń atsalysý múmkindigin talqylady.

«Bul óte jemisti de mańyzdy sapar boldy. Shynaıy dostar men baýyrlardyń kezdesýi deýge bolady. Bizdiń halyqtarymyzdy jaqyndatatyn biraz is-shara ótti jáne birqatar salada mańyzdy qujattarǵa qol qoıyldy. Biz, eki eldiń parlamentshileri, kóshbasshylarymyz qabyldaǵan osy úlken sheshimderdi iske asyrýǵa barynsha úles qosýymyz kerek», - dedi Májilis spıkeri.

Delegatsııa quramyna Qazaqstan Respýblıkasy Parlamenti Májilisi men Senatynyń depýtattary kirdi.