Parlament jáne máslıhat saılaýy: «Aýyl» partııasy málimdeme jasady

NUR-SULTAN. QazAqparat – Kóppartııaly Parlament – qazirgi zamannyń talaby. Bul týraly «Aýyl» Halyqtyq-demokratııalyq patrıottyq partııasynyń Parlament jáne máslıhattarǵa kezekti saılaýdyń jarııalanýyna qatysty málimdemesinde aıtylǵan, dep habarlaıdy QazAqparat.

«Búgin Qasym-Jomart Kemeluly Toqaev Qazaqstan Respýblıkasy Parlamenti Májilisi men máslıhattary depýtattarynyń kezekti saılaýy ótetini jaıly jarlyǵyn jarııalady. «Aýyl» partııasy Prezıdenttiń bul sheshimin quptaıdy.

Bul qazirgi kezeńdegi koronavırýs pandemııasyna qaramastan elimizdiń barlyq azamattaryna Konstıtýtsııada kórsetilgen saılaý quqyǵyn paıdalanýǵa múmkindik beretin durys sheshim. Saılaý – kez kelgen memlekettiń demokratııalyq damýynyń ajyramas bóligi», - delingen «Aýyl» partııasynyń Saıası keńes prezıdıýmy taratqan málimdemede.

Atap ótilgendeı, konstıtýtsııalyq merzimde ótkiziletin bul saılaý áıelder men jastarǵa 30 paıyzdyq kvotanyń qarastyrylýy, parlamenttik oppozıtsııa ınstıtýtynyń engizilýi, sondaı-aq máslıhat depýtattarynyń partııalyq tizimmen saılanýy sııaqty belgili bir jańashyldyqtarymen erekshelenbek.

«Biz, el turǵyndarynyń aýqymdy bóliginiń múddesin arqalaǵan partııa retinde, atalmysh ózgerister halqymyzdyń saıası partııalar ınstıtýtyna degen senimin arttyra túsedi dep esepteımiz.

Sondaı-aq, osy jolǵy saılaý kóppartııalyq parlamenttiń qalyptasýyna sebepker bolyp, qoǵamnyń jańarýǵa degen suranysyn qanaǵattandyrady dep oılaımyz.

Kóppartııaly Parlament – qazirgi zamannyń talaby, Qazaqstandaǵy saıası jańǵyrýdyń jańa kezeńi.

Saıası partııalar arasyndaǵy ádil básekelestik pen saılaý úderisi men daýystardy sanaýdaǵy ashyqtyq qana Qazaqstannyń odan ári damýynyń kepili bola alady dep esepteımiz», - dedi partııadan.