Parlament Ulttyq qordan balalarǵa aqsha aýdarýdy zańnamalyq turǵyda bekitti
«Zań jobasy 2023 jylǵy 23 mamyrda Parlament Májilisine engizildi. Qujattyń negizgi maqsaty - kámeletke tolǵan kezde jınalǵan qarajat esebinen turǵyn úı jaǵdaılaryn jaqsartýǵa nemese bilim alýǵa múmkindik jasaý maqsatynda Qazaqstan Respýblıkasy azamattarynyń óskeleń urpaǵyn qoldaý. 2023 jylǵy 20 qyrkúıekte Májilis qabyldaǵan zań Parlament Senatynyń qaraýyna jiberildi. Senat 13 qazanda zańdy qaıtardy jáne qujatqa 10 túzetý engizildi. Onyń ishinde 5 túzetý redaktsııalyq-naqtylaý sıpatynda, al qalǵan beseýi zańnyń jekelegen normalaryn zańnamalyq aktilerge sáıkes keltirýdi kózdeıdi. Atap aıtqanda, maqsatty jınaqtaýda Biryńǵaı zeınetaqy qoryndaǵy shottarǵa aýdara otyryp, ekinshi deńgeıli bankterde, ulttyq poshta operatorynda ashylǵan bank shotynan aýdarýdy retteıtin normalardaǵy dollardy teńgege aıyrbastaý «aýdarym kúnine» emes, «aýdarym sátine» dep ózgertildi. Sonymen qatar, «QR Tuńǵysh Prezıdenti – Elbasy týraly» Konstıtýtsııalyq Zańnyń qoldanylýy toqtatylýyna baılanysty termınologııalyq birizdendirý úshin «Qazaqstan Respýblıkasynyń arnaýly memlekettik organdary týraly» Zańyna túzetý engizildi. Senat engizgen túzetýler zańnyń tujyrymdamalyq erejelerin ózgertpeıdi. Joǵaryda aıtylǵandardy eskere otyryp, Májilis komıteti Senatynyń ózgeristerimen jáne tolyqtyrýymen kelisýdi usynady», - dedi Májilis depýtaty Berik Beısenǵalıev.
Jalpy otyrys barysynda palata depýtattary Senat engizgen túzetýlermen kelisti.
Atap aıtqanda, Memleket basshysy 2022 jylǵy 1 qyrkúıektegi Qazaqstan halqyna arnaǵan Joldaýynda «Ulttyq qor – balalarǵa» atty jobany iske asyrýdy usyndy. Bul joba - óskeleń urpaqtyń eresek ómirge naqty joldama alýyna baǵyttalǵan alǵashqy qadam. Qazir resmı derekter boıynsha elimizde 18 jasqa deıingi balalardyń jalpy sany shamamen 6,7 mln adamdy qurap otyr. Zańǵa sáıkes Ulttyq qordyń ınvestıtsııalyq tabysynyń 50 paıyzyn 18 jasqa deıingi barlyq jastaǵy balalar arasynda teń bólý kózdelgen. Ulttyq qor qarajaty bilim alýǵa jáne turǵyn úı jaǵdaıyn jaqsartýǵa baǵyttalǵan naqty eki maqsatta paıdalanylady.
Budan buryn habarlanǵandaı, bıyl 12 qazanda Senattyń jalpy otyrysynda «Qazaqstan Respýblıkasynyń keıbir zańnamalyq aktilerine Ulttyq qordan balalarǵa arnalǵan qarajatty esepteý, tóleý jáne paıdalaný máseleleri boıynsha ózgerister men tolyqtyrýlar engizý týraly» Zańnyń jekelegen baptary maquldanbady. Bul rette, atalǵan baptardyń jańa redaktsııasyn usyna otyryp, qujat Májiliske qaıtarylǵan edi.
Bul turǵyda zańnyń keıbir erejelerin ishinara sáıkestendirý eskerilgen. Munymen qosa, Ulttyq ál-aýqat qorynyń jalǵyz aktsıoneriniń quzyretin reglamentteıtin qaıtalanatyn normalardy alyp tastaý qarastyryldy. «Qazaqstan Respýblıkasynyń Tuńǵysh Prezıdenti – Elbasy týraly» Konstıtýtsııalyq Zańnyń qoldanylýy toqtatylýyna baılanysty «Qazaqstan Respýblıkasynyń arnaýly memlekettik organdary týraly» Zańnyń normalaryna sáıkes keltirý qamtylǵan. Bankter men salymshylar arasynda daýly jaǵdaılardyń týyndaý táýekelderin boldyrmaý maqsatynda paıdalanylmaǵan nysanaly jınaqtardy tóleý qarajatyn banktik shottardan BJZQ shottaryna AQSh dollarymen aýdarý kezinde «aýdarym kúnine» emes, «aýdarym sátine» teńgemen aıyrbastaý eskerilgen.