Parlament saılaýy elimizde saıası plıýralızmdi damytýǵa alǵyshart bolmaq - Erlan Saırov
«Basty aıta ketetin másele – 2004 jyldan bastap Parlament saılaýy konstıtýtsııalyq merzimde taǵaıyndalyp otyr. Bul aspekt elimizdegi qoǵamdyq saıası protsesterdiń boljamdylyq deńgeıin arttyrary sózsiz. Sonymen birge Ulttyq keńes aıasyndaǵy el Prezıdent Qasym-Jomart Kemeluly Toqaevtyń usynǵan saıası reformalarynyń birinshi paketi óziniń jemisin bereri anyq», - dedi QazAqparat tilshisine telefon arqyly bildirgen pikirinde sarapshy.
Erlan Saırovtyń aıtýynsha bul is-sharalardyń arasynda barlyq deńgeıdegi máslıhattardyń qatary 30 paıyzdyq kvota aıasynda jastar men áıeldermen tolyqtyrylatyny belgili.
«Nur Otan partııasynyń praımerıziniń qorytyndylaryna súıensek jastar men áıelderdiń sany máslıhattarda 50 paıyzdan asyp ketetindeı kórinip tur. Osy aspekt aýdan, oblystyq deńgeıde jastardyń sanynyń kóbeıip, aımaqtyq dárejedegi qoǵamdyq-saıası protsester paıda bolatyny anyq. Bizde saıası reformalar tek Nur-Sultan men Almaty qalasynda júrýi tıis degen jańsaq pikir bar. Al negizinde saıası reformalar aımaqta júrýi tıis. Ol úshin jergilikti máslıhattar jańaryp turýy kerek. Sol organdarǵa prıntsıpti pozıtsııasy bar, ákimderge óziniń oıyn ashyq aıta alatyn, qoǵamdyq kúsh-jigeri mol azamattar kelýi kerek. Sol kezde elimizde evolıýtsııalyq damýǵa sáıkes, jańa kúshter kelip, elimizdiń aımaqtarynda áleýmettik transformatsııa júredi», - dedi ol.
Sarapshy osy protsesterge qazir alǵyshart jasalyp otyrǵanyn jetkizdi.
«Májilistiń ózinde parlamenttik oppozıtsııanyń jumysyn damytý úshin kóptegen másele qarastyrylǵan. Osy atalǵan aspektiler elimizdiń saıası protsesterin evolıýtsııalyq túrde birte-birte ózgertýge irgetas jasaıdy. Biz turaqsyz álemde týrbýlentti zamanda elimizde turaqtylyqty saqtap otyrǵan elmiz. Demokratııalyq protsester kerek. Degenmen ol protsester elimizdiń tutastyǵy men yntymaqtastyǵyna zalalyn tıgizbeýi tıis. Sondyqtan bul saılaý halqymyzdyń yntymaǵy men birligin arttyra otyryp, elimizde saıası plıýralızmdi damytýǵa alǵyshart bolaryna senemiz», - dedi ol.
Eske sala ketsek búgin Memleket basshysy Qasym-Jomart Toqaev QR Parlamenti Májilisi jáne máslıhat depýtattary saılaýyn taǵaıyndaý týraly úndeý jarııalaǵan bolatyn.
«Búgin men Parlament Májilisi depýtattarynyń saılaýyn taǵaıyndaý týraly Jarlyqqa qol qoıdym. Ortalyq saılaý komıssııasynyń qaýlysymen barlyq deńgeıdegi máslıhat depýtattarynyń saılaýy taǵaıyndalady. Aldaǵy saılaý konstıtýtsııalyq merzimge sáıkes, 2021 jyldyń 10 qańtarynda ótedi. Barlyq saıası partııalardyń bul saılaý naýqanyna qatysýǵa daıyndalýyna, saılaý aldyndaǵy platformasyn ázirleýine, partııalyq ınfraqurylymdardy jetildirýine ýaqyty jetkilikti boldy», - dedi Prezıdent úndeýinde.