Parlament ózindik ereksheligi bar taýarlarǵa qatysty zań qabyldady

ASTANA. QazAqparat - Búgin Májilistiń jalpy otyrysynda palata depýtattary «Ózindik ereksheligi bar taýarlardy baqylaý týraly» zań jobasy men ilespe qujatqa Senat engizgen ózgeristerdi qoldady, dep habarlaıdy QazAqparat tilshisi.

«Atalǵan zań jobalaryn Parlament Májilisi 2022 jylǵy qazanda maquldady. Senat engizgen ózgerister men tolyqtyrýlar Májilis maquldaǵan zań jobasynyń tujyrymdamasyn ózgertpeıdi jáne mazmunyn nasharlatpaıdy. Túzetýler jekelegen memlekettik organdardyń olarǵa júktelgen jaýyngerlik jáne jedel qyzmettik mindetterdi sheshý úshin qarý áketý erekshelikterin, sondaı-aq QR Úkimetiniń ókilettikterin naqtylaýdy eskerip otyr», - dedi Májilis depýtaty Qudaıbergen Erjan.

Sonymen qatar «Qazaqstan Respýblıkasynyń keıbir zańnamalyq aktilerine ózindik ereksheligi bar taýarlardy baqylaý máseleleri boıynsha ózgerister men tolyqtyrýlar engizý týraly» ilespe zań jobasynda «112» Biryńǵaı kezekshi-dıspetcherlik qyzmetin qurýǵa baılanysty máseleler bóliginde túzetýler engizý usynyldy.

«Osy oraıda Májilistiń Halyqaralyq ister, qorǵanys jáne qaýipsizdik komıteti Parlament Senaty engizgen ózgeristermen kelisýdi usynady», - dedi depýtat.

Óz kezeginde Májilis depýtattary Senat engizgen túzetýlerdi qoldap daýys berdi.

Budan buryn habarlanǵandaı, ótken aptada Senat «Ózindik ereksheligi bar taýarlardy baqylaý týraly» zań jobasyn jáne ilespe qujatty talqylady. Osy oraıda olarǵa túzetýler engizilgendikten, zań jobalaryn Májiliske qaıtarǵan edi.