Parlament oralmandardyń tarıhı otanyna oralýyn yntalandyratyn Zańdy qabyldady
Atalǵan zańda etnıkalyq qazaqtardy tarıhı otanyna oralýyn yntalandyrý maqsatynda olardyń qonystaný óńirine qaramastan oralman mártebesin alý, sheteldik azamattarǵa qaraǵanda tólem qabiletin rastaýsyz ýaqytsha turý yqtııarhatyn alý múmkindigi beriledi. Bul rette Úkimet belgilegen óńirlerge qonystanǵan jaǵdaıda oralmandarǵa jaǵdaılar jasalady. Máselen, jumyspen qamtý boıynsha sharalar sheńberindegi etnıkalyq qazaqtar úshin kólik shyǵyndaryn óteıtin, qyzmettik baspana nemese jataqhanadan bólme berýdi quraıtyn áleýmettik kómekter qamtylmaq. Bundaı áleýmettik kómekter elimizdiń bir óńirinen Úkimet aıqyndaǵan ekinshi óńirine qonystanǵan oralmandar úshin de beriledi. Al alǵashqy qonystanǵan, ıaǵnı Úkimet aıqyndaǵan óńirinen bes jyl merziminen buryn óz betinshe kóship-qonyp, qonys aýdaryp ketkender, Qazaqstan Respýblıkasynyń azamattyǵyn alýdan bas tartqandar ózderi alǵan memlekettik qoldaýlardy qaıtaratyn bolady. Sonymen qatar, oralmandarǵa Qazaqstan Respýblıkasynyń azamattyǵyn berý merzimin turaqty turý yqtııarhatyn alǵannan keıin bir jyl ishinde sheshý kózdeledi.
Tutastaı alǵanda, qabyldanǵan Zań ishki eńbek naryǵyn qorǵaý, halyqaralyq mindettemelerge sáıkes bilikti sheteldik mamandardyń erkin naryǵyn qurý, etnıkalyq qazaqtardyń tarıhı otanyna oralýyn yntalandyrý maqsatynda kóshi-qon úderisin utymdy retteýge baǵyttalady.
«Máselen, bul rette elimizdiń soltústik óńirlerindegi joǵarý oqý oryndaryna, kolledjderge jastardy oqytý úshin arnaıy granttar engiziledi. Sheteldikterge onyń ishinde Qazaqstan aýmaǵynda turatyn oralmandarǵa elden shyqpaı vızany sozdyrý máseleleri de qaralyp otyr. Osy sanattaǵylarǵa turaqty turýǵa ruqsat berýler negizdemeleri jeńildetilgen. Sonymen qatar, Qazaqstannyń joǵary oqý oryndarynda oqıtyn etnıkalyq qazaqtarǵa azamattyq alý tártibi de jeńildetilip otyr», - dedi qujatqa qatysty baıandaǵan senator Lázzat Qıynov.
Parlament qabyldaǵan Zań Elbasynyń qol qoıýyna joldanady.