Parlament Májilisiniń depýtattyǵyna kandıdatýrany usyný merzimderi belgili boldy
«Partııalyq tizimder boıynsha saılanatyn Parlament Májilisiniń depýtattaryn saılaýda kandıdattardy usyný 2016 jylǵy 8 aqpanǵa deıin, al partııalyq tizimderdi tirkeý 19 aqpanǵa deıin júrgiziledi. Saılaý týraly zańǵa sáıkes, partııalyq tizimder boıynsha saılanatyn Májilis depýtattyǵyna kandıdattardy usyný quqyǵy saıası partııalarǵa, al Qazaqstan xalqy Assambleıasy saılaıtyn Májilis depýtattyǵyna kandıdattardy usyný quqyǵy Assambleıa Keńesine tıesili», - dedi ol.
Q. Turǵanqulovtyń sózi boıynsha, Qazaqstan xalqy Assambleıasy saılaıtyn Májilis depýtattaryn saılaý jónindegi saılaý rásimderiniń merzimderi partııalyq tizimder boıynsha saılanatyn depýtattardy saılaý úshin aıqyndalǵan merzimdermen tuspa-tus kelmeıdi.
«Qazaqstan halqy Assambleıasynan Májilis depýtattyǵyna kandıdattardy usyný 29 aqpanǵa deıin sozylyp, al olardy tirkeý 29 aqpan - 5 naýryz aralyǵynda ótedi. Máslıxattar depýtattaryn saılaýda kandıdattardy usyný 2016 jylǵy 19 aqpanǵa deıin júrgiziledi», - dep atap ótti Q.Turǵanqulov.
Onyń aıtýynsha, jalpy Parlament Májilisine 107 depýtat saılanady. «Onyń ishinde 98 depýtat partııalyq tizim boıynsha, 9-y Qazaqstan xalqy Assambleıasy atynan saılanbaq. Al jergilikti máslıxatqa 3 335 depýtat saılanady. Onyń ishinde oblystyq máslıxattarǵa - 550, qalalyq - 625, sondaı-aq 2160 depýtat aýdandyq deńgeılerde saılanady», - dedi ol.
QR Parlament Májilisiniń jáne máslıxat depýtattaryn saılaý naýqanyna shamamen 8 mlrd teńge bólinedi dep qarastyrylǵan.