Parlament Májilisi «Mass-medıa týraly» zań jobasyn talqylaıdy

ASTANA. QazAqparat – Parlament Májilisiniń qaraýyna «Mass-medıa týraly» zań jobasy men ilespe qujat kelip tústi, dep habarlaıdy QazAqparat tilshisi.

«Bul qujattar Úkimettiń zań jobalaý josparyna sáıkes ázirlendi. «Mass-medıa týraly» zań jobasy osy saladaǵy zańnamany jetildirýge baǵyttalǵan. Іlespe zań jobasynda úsh kodekske jáne 12 zańǵa ózgeris pen tolyqtyrý engizý josparlanǵan. Áleýmettik-mádenı damý komıteti atalǵan zań jobalary boıynsha qorytyndy ázirleýge daıyn», - dedi Májilistiń Áleýmettik-mádenı damý komıtetiniń tóraǵasy Ashat Aımaǵambetov palatanyń jalpy otyrysynda.

Bıyl mamyr aıynda Aqparat jáne qoǵamdyq damý mınıstri Darhan Qydyráli atalǵan zań jobalaryna qatysty pikir bildirgen edi.

«Mass-medıa týraly zań jýrnalıstiń quqyǵyn aıqyndaıdy. Onyń mártebesin belgilep, bekitedi. Biz árıne, ol zańnyń da jetilýine, júrýine mınıstrlik retinde kómek kórsetemiz», - degen bolatyn mınıstr.