Parlament Májilisi Áleýmettik kodekstiń jobasyn qaraıdy
«Áleýmettik qyzmetti jańǵyrtý arqyly áleýmettik sala menedjmenti tıimdiligin arttyrý josparlanyp otyr. Internet-palatformalar kómegimen jumyspen qamtý isin retteý, jumyspen qamtý ortalyqtaryn tarnasformatsııalaý sharalary qolǵa alynyp jatyr. Sonymen qatar, áleýmettik sala qyzmetkerleriniń mártebesin nyǵaıtý boıynsha normalar qarastyrylǵan. Jalpy, Áleýmettik kodekstiń jobasy bul saladaǵy zańnamany júıelendire túsedi, sondaı-aq qaterler bolǵan jaǵdaıda birtutas quqyqtyq negiz qalyptastyrady», - dedi Májilistiń Áleýmettik-mádenı damý komıtetiniń tóraıymy, depýtat Jámılá Nurmanbetova.
Onyń aıtýynsha atalǵan kodeksti ázirleý birqatar zańnamalyq aktilerge jáne Ákimshilik quqyq buzýshylyq týraly kodekske ózgerister engizýdi talap etedi.
«Osy oraıda úsh ilespe zań jobasy ázirlendi. Áleýmettik-mádenı damý komıteti atalǵan zań jobalaryn talqylaýǵa jáne olar boıynsha qorytyndy ázirleýge daıyn», - dedi J.Nurmanbetova.
Budan buryn habarlanǵandaı, 2022 jyldyń aıaǵynda Úkimet Áleýmettik kodekstiń jobasyn qabyldady.
«Bul asa mańyzdy qujat azamattardyń ómirindegi, ıaǵnı adamnyń týǵannan bastap qartaıǵanǵa deıingi bazalyq áleýmettik quqyqtaryn belgileıdi. Ol birinshi kezekte halyqtyń turmys sapasyn jaqsartýǵa baǵyttalǵan. Muny iske asyrý úshin qoldanystaǵy normatıvtik bazany qaıta qaraýymyz kerek. Kodeks qabyldanǵan soń jańa áleýmettik saıasat ótinish berý formasynan proaktıvti formatqa kóshý kerek. Ol Otbasynyń tsıfrlyq kartasyn engizý arqyly júzege asyrylady», - dedi Premer-Mınıstr Álıhan Smaıylov.