Parlament máslıhattyń mártebesin arttyrý boıynsha túzetýlerdi qabyldady

NUR-SULTAN. QazAqparat – Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine aýdandyq, qalalyq jáne aýyldyq bılik deńgeıleriniń derbestigi men jaýapkershiligin keńeıtý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaıdy QazAqparat tilshisi.

Zań jobasy Memleket basshysynyń «Cyndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýyn iske asyrý maqsatynda ázirlendi.

Zań jobasynda birqatar normatıvtik quqyqtyq aktilerge ózgerister men tolyqtyrýlar engizý usynylady:

- aýdandyq mańyzy bar qalalardyń, aýyldardyń, kentterdiń jáne aýyldyq okrýgterdiń kiris bazasyn keńeıtý;

- bıýdjettik rásimderdi ońaılatý;

- jergilikti ókildi jáne atqarýshy organdardyń derbestigin keńeıtý jáne jaýapkershiligin kúsheıtý;

- ákimshilik-aýmaqtyq birlikterge qoıylatyn talaptardy jetildirý.

«Negizgi normalarǵa toqtalsaq, jergilikti ózin-ózi basqarýdy damytý bıýdjetiniń kiris kózderin ulǵaıtý maqsatynda tórtinshi deńgeıge qosymsha salyqtar men tólemderdiń 4 túrin berý usynylady.

Ekinshiden, bıýdjettik rásimderdi ońaılatý usynylady. Atap aıtqanda, jıyrma paıyzdan aspaıtyn kólemde aýyldyq okrýg ákimi apparaty úshin bıýdjetke túzetýler engizýdi kózdeý usynylady. Túzetý jergilikti qoǵamdastyq jınalysynyń kelisimi boıynsha júrgiziletin bolady.

Sondaı-aq máslıhattardyń sheshimderin ádilet organdarynda tirkeý qajettiligi boıynsha normany alyp tastap, bıýdjetterdi bekitý rásimin ońaılatý usynylady», - dedi QR Ulttyq ekonomıka mınıstri Áset Erǵalıev.

Sonymen qatar, qarjy jyly kezeńinde aýdan jáne aýyldyq okrýg bıýdjetteri arasyndaǵy jalpy sıpattaǵy transfertter kóleminiń ózgerýine jol bermeıtin Bıýdjet kodeksine naqtylaýshy norma engiziledi.

«Ákimshilik-aýmaqtyq birlikter sanatyn ózgertý tártibin anyqtaýdy usynamyz. Qala mártebesin ózgertý bes jyl ishinde, al aýyldar úsh jyl ishinde osy Zańda belgilengen talaptarǵa sáıkes kelmegen jaǵdaıda júzege asyrylady. ıAǵnı, jergilikti atqarýshy jáne ókildi organdar osy kezeńde eldi mekenderdiń odan ári keleshegin eskere otyryp, ekonomıkalyq damýy úshin sharalar qabyldaýy tıis», - dedi mınıstr.

Budan bólek, máslıhat pen onyń depýtattarynyń mártebesin arttyrý boıynsha birqatar túzetýler qarastyrylǵan.

«Máslıhat sessııasy tóraǵasynyń qyzmetin taratyp, onyń ókilettigin máslıhat hatshysyna berý usynylady. Sonymen qatar, árbir oblys pen respýblıkalyq mańyzy bar qalalarda máslıhattardyń turaqty komıssııa tóraǵalarynyń bosatylǵan eki laýazymyn engizý usynylady.

Bul rette turaqty negizde jumys isteıtin turaqty komıssııalardyń tóraǵalary bolyp ártúrli saıası partııalardyń ókilderin saılaýdy usynady. Bul sharalar aımaqtardy saıası básekelestikti yntalandyrýǵa áser etedi. Bul zań jobasy óńirlerdiń derbestigi men jaýapkershilik deńgeıin arttyrýǵa jáne jergilikti mańyzy bar máselelerdi neǵurlym jedel sheshý úshin bıýdjettik rásimderdi aıtarlyqtaı jeńildetýge múmkindik beredi», - dedi Á. Erǵalıev.