Parlament lotereıanyń zańsyz jarnamasyna aıyppul salýǵa qatysty qujatty qabyldady
QR Mádenıet jáne sport mınıstri Aqtoty Raıymqulova zań jobasyna engizilgen ózgertýler men tolyqtyrýlar týraly aıtyp berdi.
Atap aıtqanda, lotereıa operatory bolyp sanalmaıtyn tulǵanyń lotereıa oıyndaryn júrgizgeni úshin ákimshilik jaýapkershiliktiń engizilýi eskerilgen. Osy oraıda jeke tulǵalarǵa - júz aılyq eseptik kórsetkish mólsherinde, shaǵyn bıznes nemese kommertsııalyq emes uıymdar úshin - úsh júz, orta bıznes úshin - bes júz, iri bıznes úshin bir myń aılyq eseptik kórsetkish mólsherinde aıyppul salynady.
«Al bir jyl ishinde qaıtalanyp jasalǵan zańsyz is-áreketter úshin jeke tulǵalarǵa eki júz, shaǵyn kásipkerlik sýbektilerine nemese kommertsııalyq emes uıymdarǵa - jeti júz elý, orta kásipkerlik sýbektilerine – bir myń, iri bıznes úshin eki myń aılyq eseptik kórsetkish mólsherinde aıyppul salynyp, ákimshilik quqyq buzýshylyqtyń tabystary tárkilenedi», - dep túsindirdi mınıstr.
Mınıstrdiń sózine qaraǵanda, lotereıa operatorymen nemese taratýshylarymen (agentterimen) lotereıa operatorymen qurylǵan komıssııalyq kelisimshart aıasynda ornalastyrylǵan jarnamadan bólek lotereıa jarnamasyna tyıym salynady.
Budan buryn habarlanǵandaı, Aqtoty Raıymqulova lotereıa operatorynyń jalpy aınalymdaǵy qarjysy týraly aıtty.
«Lotereıalar jáne lotereıa qyzmeti týraly» Zań 2016 jylǵy 9 sáýirde qabyldanǵan bolatyn jáne búgingi ýaqytta zańnama deńgeıinde óz sheshimin qajet etetin, biraz máseleler anyqtaldy. 2017 jylǵy № 48 Úkimet qaýlysymen «Sátti Juldyz» Aktsıonerlik Qoǵamy lotereıa operatory bolyp 15 jyl merzimge anyqtaldy. Lotereıa operatorynyń qyzmetkerleriniń sany 748 adamdy quraıdy. Respýblıka boıynsha 3 myńǵa jýyq taratýshy (agentter) sany shaǵyn jáne orta kásipkerlerden turady.