Parlament Keden odaǵynyń aıasynda terrorızmdi qarjylandyrýǵa qarsy is-qımyl týraly shartty qabyldady

ASTANA.  4 qazan. QazAqparat -  Búgin Parlament Senatynyń jalpy otyrysynda «Keden odaǵynyń kedendik shekarasy arqyly qolma-qol aqsha qarajatyn jáne (nemese) aqsha quraldaryn ótkizý kezinde qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy  is-qımyl týraly shartty ratıfıkatsııalaý týraly» zań qabyldandy.

Endi qujat Memleket basshysynyń qol qoıýyna jiberiledi.

Atalǵan shartqa 2011 jyldyń 11 jeltoqsanynda Máskeýde qol qoıylǵan. Qujattyń maqsaty qylmystyq jolmen alynǵan kiristerdi zańdastyrýǵa qarsy is-qımyl júıesi jumys isteýiniń tıimdiligin arttyrý bolyp tabylady. Shartqa sáıkes taraptardyń keden organdary Keden odaǵynyń zańnamasyna jáne ulttyq zańnamaǵa sáıkes kedendik deklaratsııada málimdelgen derekterdi paıdalana otyryp, aqsha qarajatynyń jáne aqsha quraldarynyń ótkizilýin baqylaıtyn bolady. Budan bólek taraptardyń keden organdary ózderine quqyq qorǵaý organdary men ýákiletti organdardan kelip túsken aqparat negizinde qolma-qol aqsha qarajattaryn ótkizýdi toqtata turý jónindegi ókilettikterdi alady, sondaı-aq osy týraly tıisti aqparatpen qajetti organdardy habardar etedi.