Parlament Keden odaǵy aıasyndaǵy tarıf stavkalaryna ózgeris engizetin qujatty qabyldady

ASTANA. 31 qazan. QazAqparat - Búgin spıker Qasym-Jomart Toqaevtyń tóraǵalyǵymen ótken Parlament Senatynyń jalpy otyrysynda «2008 jylǵy 12 jeltoqsandaǵy Aıryqsha jaǵdaılarda Biryńǵaı kedendik tarıftiń stavkalarynan erekshelenetin kedendik ákelý bajdarynyń stavkalaryn qoldaný sharttary men tártibi týraly hattamaǵa ózgerister engizý týraly hattamany ratıfıkatsııalaý týraly» zańy qabyldanady.

Qabyldanǵan zań negizgi Hattama normalaryn 2011 jylǵy 18 qarashadaǵy Eýrazııalyq ekonomıkalyq komıssııa týraly sharttyń normalaryna sáıkes keltirýdi, atap aıtqanda Keden odaǵynyń komıssııasyn taratýdy jáne ókilettikterin Eýrazııalyq ekonomıkalyq komıssııaǵa berýdi kózdeıdi.

Atalǵan hattama Biryńǵaı kedendik tarıftiń stavkalarynan erekshelenetin ımporttyq keden bajdaryn birjaqty tártippen qoldanýdyń neǵurlym uzaq merzimin belgileýge múmkindik beredi. Eger osyndaı sharalar tarap memleketi ekonomıkasynyń tıisti salasyn damytý úshin qajetti bolyp tabylsa, onda memleketterdiń biri neǵurlym joǵary stavkany qoldana alady. Sondaı-aq, úshinshi elderden dástúrli ımportyna eleýli deńgeıde táýeldi jáne keden odaǵynda mundaı taýarlar óndirisin qanaǵattandyrý múmkin emes ishki naryqtaǵy taýarlardyń asa tapshylyq jaǵdaıyndaǵy taraptardyń biri neǵurlym tómen stavkany qoldana alady. Sondaı-aq, mundaı joǵary nemese tómen stavkalardy qoldaný merzimi 2008 jylǵy hattamada 6 aıdan aspaıtyn bolatyn. Degenmen, osy ózgeristerdi engizýde ondaı stavkalardyń qoldaný merzimin barynsha uzartýǵa qol jetip otyr.

Parlament qabyldaǵan zań Memleket basshysynyń qol qoıýyna joldanady.