Parlament Qazaqstanda Dúnıejúzilik Bank ofısterin qurý týraly kelisimdi qabyldady

ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń Úkimeti men Halyqaralyq Qaıta Qurý jáne Damý Banki arasyndaǵy Qazaqstan Respýblıkasynda ofıster qurý jáne olardyń jumys isteýi týraly kelisimdi ratıfıkatsııalaý týraly» QR Zańyn qabyldady.

Qazaqstan men Dúnıejúzilik Bank arasyndaǵy yntymaqtastyqty odan ári nyǵaıtý maqsatyndaǵy kelisimge 2016 jylǵy 21 qańtarda Davosta Dúnıejúzilik ekonomıkalyq forým aıasynda qol qoıylǵan.

Kelisim 1994 jylǵy 23 mamyrdaǵy Almaty qalasynda turaqty ókildik qurý týraly shartty almastyrady. 2001 jyldan bastap, Dúnıejúzilik banktiń ókildigi Astanada jumys isteıtini, al, Almaty keńsesi osy qarjy ınstıtýtynyń Ortalyq Azııadaǵy aımaqtyq ókildigi mártebesin alǵany belgili.

«Dúnıejúzilik Banktiń qyzmetkerlerine teń quqyqtar berý maqsatyndaǵy jańa kelisimge sáıkes, olardyń azamattyǵyna qaramastan artyqshylyqtar men ımmýnıtetter beriledi. Bul rette Dúnıejúzilik Banktiń qyzmetkerlerine olardyń azamattyǵyna qaramastan teń quqyqtardy qamtamasyz etý maqsatynda jergilikti qyzmetkerlerdiń artyqshylyqtary men ımmýnıtetteri, atap aıtqanda, salyq tóleý men áleýmettik tólemderden ımmýnıtet beriledi», dedi Ulttyq ekonomıka mınıstri Erbolat Dosaev.

Onyń aıtýynsha, Kelisimde qarastyrylǵan artyqshylyqtar Ortalyq azııadaǵy óńirlik ofıs retindegi Dúnıejúzilik Bank ofısteri mártebesiniń keńeıýimen, sonymen birge, Qazaqstan Úkimetine senim deńgeıiniń ósýine baılanysty.

Qujatqa sáıkes, Dúnıejúzilik bank Qazaqstanda ofısterge ıe bolyp, olardy operatsııalyq jáne ákimshilik qoldaý qyzmetterin kórsetý úshin qyzmetkerlermen jasaqtaıtyn bolady. Dúnıejúzilik bank qyzmetkerler men qyzmetshilerge jalaqy men basqa da shyǵystardy tolyq kólemde ózine alady. Banktiń ofısteri men úı-jaılaryna qol suǵylmaıdy jáne ol Dúnıejúzilik banktiń qaraýy men basqarýynda bolady.

Parlament qabyldaǵan zań Memleket basshysynyń qol qoıýyna joldanady.