Parlament Qazaqstan men Vetnam arasynda salyq salýdan jaltarýǵa jol bermeıtin kelisimdi qabyldady

ASTANA. QazAqparat - Búgin Parlament Senatynyń jalpy otyrysynda «Qazaqstan Respýblıkasynyń Ykimeti men Vetnam Sotsıalıstik Respýblıkasynyń Ykimeti arasyndaǵy Tabysqa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly kelisimdi ratıfıkatsııalaý týraly» QR Zańyn qabyldady.

«Kelisimniń maqsaty - ınvestıtsııalar úshin qolaıly jaǵdaılar jasaý jolymen Qazaqstan men Vetnam arasyndaǵy ekonomıkalyq yntymaqtastyqty nyǵaıtý jáne keńeıtý. Qujat ýaǵdalasýshy memlekettiń rezıdenti bolyp tabylatyn zańdy jáne jeke tulǵalardyń tabystaryna qosarlanǵan salyq salýdy boldyrmaýdy kózdeıdi. Sondaı-aq kelisim eki memlekettiń quzyretti organdary arasynda salyq máseleleri boıynsha aqparat almasý arqyly salyqtyq jaltarýdyń aldyn alýdy sheshedi», - dedi Qarjy mınıstri Baqyt Sultanov.

Onyń aıtýyna qaraǵanda, kelisimdi iske asyrý bıýdjetten qosymsha qarjy shyǵyndaryn talap etpeıdi. Eki memleket arasyndaǵy salyq salý máseleleriniń zańnamalyq bazasy retinde kelisimniń mańyzy zor bolyp tabylady. Sonymen qatar, qujatty qabyldaý memleketter rezıdentteri bolyp tabylatyn azamattarǵa salyqtyq júktemelerdi aıtarlyqtaı jeńildetip, jaǵymdy bıznes-klımat qalyptastyrady. Bul óz kezeginde sheteldik ınvestıtsııanyń aǵymyna, uıymdasqan bızneske jaǵdaı týǵyzýy da múmkin.

Aıta keterligi, Qazaqctan men Vetnam arasyndaǵy taýar aınalymy 2014 jyly 270 mln. dollardy quraǵan.