Parlament halyq pikirine qulaq asyp otyr – Saırov beıbit jınalystar týraly zań jobasy týraly
Senatta qaralǵan búgingi zań jobayna qatysty Eýrazııalyq ıntegratsııa ınstıtýtynyń dırektory Erlan Saırov osylaı pikir bildirdi, dep habarlaıdy QazAqparat tilshisi.
«Qazaqstan Prezıdenti Qasym-Jomart Toqaevtyń «Halyq únine qulaq asatyn memleket» kontseptsııasy qazir is júzine asyp jatyr. Beıbit jınalystar týraly zań Qazaqstan qoǵamynda qyzý jáne jan-jaqty talqylanǵan zań jobalarynyń biri. Bul zańdy ázirlegen Aqparat jáne qoǵamdyq damý mınıstrligi. Mınıstrlik zańnyń kontseptsııasynyń ózi jasalǵan kezde búkil qoǵammen kelisip, túsinýge tyrysty. Májiliske túsken kezde Nurlan Nyǵmatýlın osy zań boıynsha Qazaqstan men shetel sarapshylaryn shaqyryp, úlken dóńgelek ústel ótkizgen bolatyn», - deıdi Erlan Saırov.
Saıasattanýshynyń aıtýynsha, zań áli de qyzý talqylanyp jatyr.
«Qoǵamnyń bir bóligi bul zańnyń keıbir aspektisine qarsy. Sondyqtan Senattyń bul zańdy qaıtadan Májiliske qaıtarýy – búgingi tańda bizdiń elimizde demokratııalyq protsesterdiń is júzinde damyp jatqanyn, sonymen birge azamattardyń pikirine depýtattardyń, Parlamenttiń qulaq asyp jatqanyn kórsetedi. Meniń oıymsha, osyndaı kelisimderdiń arqasynda Qazaqstan qoǵamy qoldanýǵa qolaıly zańǵa ıe bolady», - dedi Erlan Saırov.