Parlament depýtaty BJZQ jumysyna aýdıt júrgizýdi usyndy
Jaqynda depýtat zeınetaqy jınaǵyn paıdalaný shegin tómendetýdi usynǵan edi.
«Meniń depýtattyq saýalymnan keıin BJZQ baspasóz habarlamasyn jarııalady. Onda 2014 jyldan bastap 115,2 paıyz ınflıatsııa bolǵan kezde zeınetaqy aktıvteriniń jınaqtalǵan kirisi 119,5 paıyzdy quraǵany aıtylǵan. Osyny olar jetistik pen tabys retinde kórsetip otyr. Bul derekterdiń qısynsyzdyǵyn túsiný úshin 2014 jyldan beri dollardyń teńgege shaqqandaǵy baǵamy 3 esege óskenin eske sala keteıin. Qarapaıym tilmen aıtqanda, jaı ǵana shetel valıýtasyna ınvestıtsııalaý arqyly BJZQ-ǵa qaraǵanda 2 ese kóp tabys tabýǵa bolatyn edi. Sońǵy 12 aıda BJZQ kiristiligi 6 paıyzdan aspady. Osy kezeńdegi azyq-túlik ınflıatsııasy 24 paıyzdan asty», - dedi A.Jamalov Premer-Mınıstr Álıhan Smaıylovtyń atyna joldaǵan saýalynda.
Onyń pikirinshe, BJZQ qyzmetiniń tıimsizdigi men ashyq bolmaýy osy taqyryp boıynsha jeke parlamenttik tyńdaý ótkizýdi qajet etedi. Ol úshin jańa aýdıtorlyq palata BJZQ-nyń qarajat jumsaý operatsııalaryna qatysty shuǵyl táýelsiz aýdıt júrgizip, aktıvter men ınvestıtsııalyq portfeldi qarap shyǵýy tıis. BJZQ óziniń tıimsiz jumysy aıasynda azamattardyń jınaqtalǵan zeınetaqy qarajatyn paıdalanýy múmkindigine barynsha qarsylyq kórsetip otyr.
Budan buryn habarlanǵandaı, bıyl qarasha aıynyń sońynda Biryńǵaı jınaqtaýshy zeınetaqy qory zeınetaqy qarajatyn merziminen buryn paıdalanýdyń 2023 jylǵa eń tómen jetkiliktilik shegin belgiledi.