Parlament bankterdiń kepildik saıasatyn jetildiretin zańdy qabyldady

NUR-SULTAN. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine memlekettik basqarý, ekinshi deńgeıdegi bankterdiń kepildik saıasatyn, baǵalaý qyzmetin retteýdi jáne atqarýshylyq is júrgizýdi jetildirý máseleleri boıynsha ózgerister men tolyqtyrýlar engizý týraly» zań jobasyna Senat engizgen ózgeristermen kelisti, dep habarlaıdy QazAqparat tilshisi.

«Zań jobasy QR Úkimetiniń 2020 jylǵy 30 qyrkúıektegi qaýlysyna sáıkes Parlament Májilisiniń qaraýyna engizildi. Qujat bıýdjettik, salyq zańnamasyn jáne ekinshi deńgeıli bankterdiń kepildik saıasatyn jetildirýge, baǵalaý qyzmetiniń ári atqarýshylyq óndiristi retteýge baǵyttalǵan. 2021 jylǵy 24 qarashada Májilis ekinshi oqylymda maquldaǵan zań jobasy Senattyń qaraýyna jiberildi. Zań jobasyn Senat 2021 jylǵy 23 jeltoqsanda keri qaıtardy. Barlyǵy 24 túzetý engizildi. Onyń ishinde EAEO-nyń 2022 jylǵy 1 qańtardan 2024 jylǵy 1 qańtarǵa deıin «Alkogol óniminiń qaýipsizdigi týraly» tehnıkalyq reglamentin qoldanysqa engizý merzimin keıinge shegerýge baılanysty alkogoldik ónimder men alkogoldik ónimderdiń túrlerine qatysty 15 túzetý engizildi», - dedi Májilis depýtaty Danııar Álimbaev.

Sonymen qatar, redaktsııalyq túsindirý sıpatyndaǵy 6 túzetý jáne quqyqtyq tehnıkaǵa 3 túzetý engizildi.

«Senat engizgen túzetýler zań jobasynyń tujyrymdamalyq erejesin ózgertpeıdi. Joǵaryda aıtylǵandardy eskere otyryp, komıtet (Májilistiń Qarjy jáne bıýdjet komıteti) zań jobasyna Parlament Senaty engizgen ózgeristermen ári tolyqtyrýlarmen kelisýdi usynady», - dedi depýtat.

Qujatty qaraý kezinde palata depýtattary bul usynysqa qoldaý bildirdi.

Budan buryn habarlanǵandaı, jaqynda atalǵan zań jobasyna toltyrýlar engizip, Májiliske qaıtardy.