Parlament Azııa Damý Bankine qatysty qujatty qabyldady

NUR-SULTAN. QazAqparat – Senattyń jalpy otyrysynda «Áriptestik týraly negizdemelik kelisimdi (2014 jylǵy 4 mamyrdaǵy QR Úkimeti men Azııa Damý Banki arasyndaǵy Qazaqstan Respýblıkasyn ekonomıkalyq ártaraptandyrý jáne onyń ornyqty damýyna, jalpy ósýine járdemdesý maqsatynda yntymaqtastyqty kúsheıtý jónindegi áriptestik týraly negizdemelik kelisimge túzetýler men tolyqtyrýlar) ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Kelisim 2019 jylǵy 27 tamyzda Nur-Sultan qalasynda bekitilgen.

«Kelisim memlekettik kepildikpen qaryz alý kezinde Azııa Damý Bankiniń erejeleri men talaptaryn saqtaý boıynsha normalardy belgileıdi. Olar sybaılas jemqorlyqqa qarsy kúres, taýarlardy, jumystar men qyzmetterdi satyp alý, ekologııalyq jáne áleýmettik qorǵaý sharalary, negizgi eńbek standarttary, tólemder, aqparatty ashý, sondaı-aq genderlik damý boıynsha erejeler men talaptardy qamtıdy. Bul sharttardy memlekettik kepildikpen alynǵan qaryzdarda qoldaný - jobalardyń qarjylandyrý tetikterin keńeıtýge múmkindik beredi», - dedi Ulttyq ekonomıka mınıstri Rýslan Dálenov.

Onyń sózine qaraǵanda, kelisimge sáıkes yntymaqtastyqtyń negizgi maqsattary men baǵyttary makroekonomıkalyq ornyqtylyqty arttyrý, ınfraqurylym men kommýnaldyq qyzmetterdi jańǵyrtý, aýyl sharýashylyǵy sektoryn damytýǵa járdemdesý, shaǵyn jáne orta bıznesti qarjylandyrýǵa qoljetimdilikti jaqsartý, ınfraqurylymǵa ári densaýlyq saqtaý men bilim berý sııaqty áleýmettik sektorlarǵa ınvestıtsııalardy ulǵaıtý bolyp otyr.

«Azııa Damý Bankiniń qyzmeti jumys oryndaryn qurý, ınnovatsııalardy yntalandyrý, áleýetti ulǵaıtý, bilim men úzdik halyqaralyq praktıkalardy engizý negizinde keń aýqymdy qoldaý kórsetý arqyly ekonomıkalyq damýǵa óz úlesin qosyp otyr. Kelisimdi ratıfıkatsııalaý teris áleýmettik-ekonomıkalyq jáne quqyqtyq saldarǵa ákep soqtyrmaıdy, sondaı-aq respýblıkalyq bıýdjetten qosymsha qarajatty talap etpeıdi», - dedi vedomstvo basshysy.