Parlament asyl tuqymdy mal sharýashylyǵy salasyn damytýǵa arnalǵan qujatty qabyldady

ASTANA. QazAqparat – Senattyń jalpy otyrysynda «Qazaqstan Respýblıkasynyń keıbir zańnamalyq aktilerine asyl tuqymdy mal sharýashylyǵy jáne bıootyn aınalymy máseleleri boıynsha ózgerister men tolyqtyrýlar engizý týraly» Zańy ekinshi oqylymda qaralyp, qabyldandy, dep habarlaıdy QazAqparat tilshisi.

«Qaralyp otyrǵan zań jobasyn qabyldaý asyl tuqymdy mal sharýashylyǵy salasynda qoldanystaǵy zańnamany jetildirip, zamanaýı normatıvtik-quqyqtyq baza qurýǵa, selektsııalyq jáne asyl tuqymdy mal sharýashylyǵy jumystaryn júrgizý tásilderin qaıta rettep, aýyl sharýashylyǵy maldarynyń genetıkalyq áleýeti men ónimdilik kórsetkishterin jańa deńgeıge kóterýge baǵyttalǵan. Sonymen qatar, bıoetanoldy paıdalaný aıasyn keńeıtý kózdelgen. Zań jobasy Senat otyrysynda qaralyp, birinshi oqylymda maquldandy», -dedi senator Dúısenǵazy Mýsın.

Osy oraıda ol bul qujat asyl tuqymdy mal sharýashylyǵy salasyn sapaly jańa deńgeıge kóterýge, elimizdiń azyq-túlik qaýipsizdigin nyǵaıtýǵa oń áserin tıgizetinin aıtty.

Qujat agroónerkásip keshenin ári qaraı jańǵyrtýǵa jáne tsıfrlandyrýǵa, asyl tuqymdy mal sharýashylyǵyndaǵy tıimdilik pen básekege qabilettilikti arttyrýǵa, bıoetanoldy paıdalaný salasyn keńeıtýge jáne osy baǵyttaǵy taǵy basqa basymdyqtardy jetildirýge arnalǵan.