Parlament 2017 jylǵy bıýdjettiń oryndalýy týraly Úkimet pen Esep komıtetiniń esepterin bekitti

ASTANA. QazAqparat - Búgin QR Parlamenti palatalarynyń birlesken otyrysynda depýtattar ótken jylǵy respýblıkalyq bıýdjettiń atqarylýy týraly Úkimet pen Esep komıtetiniń esepterine qoldaý bildirdi, dep habarlaıdy QazAqparat tilshisi.

«2017 jylǵy respýblıkalyq bıýdjettiń atqarylýy týraly Úkimettiń esebin qoldap, daýys bergenderińizge úlken alǵysymyzdy bildiremin. Búgingi qoıylǵan suraqtaryńyz ben kóterilgen máseleler óte kúrdeli, sondaı- aq aıtylǵan usynystar men pikirlerińiz mańyzdy. Osynyń barlyǵyn Úkimette qarap, ózderińizben birge taǵy da aqyldasyp, aldaǵy ýaqytta jumysymyzda eskeremiz dep senim bildirgim keledi», - dedi QR Premer-Mınıstri Baqytjan Saǵyntaev.

Budan buryn habarlanǵandaı, QR Parlamenti palatalarynyń birlesken otyrysynda QR Qarjy mınıstri Baqyt Sultanov respýblıkalyq bıýdjettiń oryndalýy barysy týraly esebin tanystyrdy. 

«2017 jylǵy respýblıkalyq bıýdjettiń atqarylýynyń negizgi maqsattary - ekonomıkanyń jáne áleýmettik ál-aýqattyń ósýiniń oń qarqyndaryn saqtap qalý, daǵdarystan keıingi damý úshin jaǵdaı jasaý boldy. Nátıjesinde, ekonomıkanyń ósýi 4 paıyzdy qurady. JІÓ-niń osyndaı ósimine syrtqy faktorlardan basqa, ónerkásiptiń 7,1 paıyzǵa jáne qyzmet kórsetý salasynyń 2,7 paıyzǵa ósýi yqpal jasady. Bıýdjettiń kiristeri 9,7 trln teńgege jetti. Onyń 48 paıyzy transfertterge keledi.  Bıýdjettiń kiristeriniń áli de bolsa Ulttyq Qordan tartylatyn transfertter men shıkizat sektorynan táýeldiligi, salyqtyq ákimshilendirýdegi biraz kemshilikter týraly sizderdiń aıtqan eskertýlerińiz oryndy. Ótken jyly qabyldanǵan Jańa Salyq kodeksi salyqtyq ákimshilendirýdi jetildirý jolymen bıznestiń turaqty damýyna, ınvestıtsııalardy yntalandyrýǵa jáne eldiń básekege qabilettiligin arttyrýǵa baǵyttalǵan», - dep toqtaldy mınıstr.

Sonymen qatar B. Sultanov ótken jyly barlyq áleýmettik mindettemeler oryndalǵanyn atap ótti.