Parlament 11 halyqaralyq shart pen memleketaralyq kelisimdi ratıfıkatsııalady – Májilis tóraǵasy

ASTANA. QazAqparat – Parlamenttiń jalpy otyrystaryn telearnalarda tikeleı efırde kórsetý bastamasyn jurtshylyq jaqsy qabyldap jatyr. Bul týraly qos palatanyń otyrysynda Májilis tóraǵasy Erlan Qoshanov aıtty, dep habarlaıdy QazAqparat tilshisi.

«Memleket basshysynyń «Kúshti Prezıdent – yqpaldy Parlament – esep beretin Úkimet» formýlasy aıasynda Májilistiń ókilettigi, baqylaýshylyq fýnktsııasy kúsheıtildi. Prezıdent aıtqandaı, biz bıýdjettiń atqarylýy barysyn, árbir tıynnyń jumsalýyn qatań qadaǵalaýymyz qajet. Osyǵan oraı Joǵary aýdıtorlyq palatanyń esebin tyńdadyq. Onda halyqty tolǵandyratyn eń ózekti taqyryp – jylýmen qamtý máselesi kóterildi. Qoǵamdy, depýtattardy jylý ortalyqtarynyń qysqy maýsymǵa daıyndyǵy alańdatyp otyr. Osy jóninde biraz synı pikirler aıtyldy. Nátıjesinde Úkimet pen Joǵary aýdıtorlyq palataǵa tıisti usynymdar joldandy», - dedi E. Qoshanov.

Palata spıkeriniń aıtýynsha, Májilistiń kelesi esebi memlekettik qaryz taqyrybyna arnalady. Osy taqyryp aldaǵy sessııada talqylanbaq.

«Sonymen qatar depýtattar halyqaralyq sharttar men kelisimderdiń otandyq bazasyn qalyptastyrýǵa basa mán berdi. Parlament 11 halyqaralyq shart pen memleketaralyq kelisimdi ratıfıkatsııalady. Zań shyǵarý salasyndaǵy bizdiń barlyq jumysymyz qoǵam úshin ashyq ekenin erekshe atap ótkim keledi. Osy sessııada, Memleket basshysynyń tapsyrmasyna sáıkes, Parlamenttiń qos palatasy jalpy otyrystardy «Habar 24» telearnasynda tikeleı efırde kórsetýge kóshti. Sondaı-aq Májilistiń jalpy otyrysy «Jibek joly» telearnasynan kórsetilip keledi. Bul bastamany jurtshylyq jaqsy qabyldap jatyr», - dedi Májilis tóraǵasy.

Budan buryn habarlanǵandaı, búgin Parlament palatalarynyń birlesken otyrysy ótip, onda segizinshi saılanǵan Parlamenttiń birinshi sessııasy resmı túrde jabyldy.

Depýtattar bıylǵy 1 qyrkúıekke deıin parlamenttik kanıkýl dep jarııalanatyny týraly arnaıy qaýly qabyldady.