Parıjdegi Olımpıada oıyndarynda el namysyn qorǵaýǵa Shyǵys Qazaqstannan 11 úmitker irikteldi
2024 jyly 26 shilde men 11 tamyz aralyǵynda Parıjde ótetin 33-shi jazǵy Olımpıada oıyndarynda álemniń ár jerinen jıylǵan sportshylar 32 sport túrinen baq synaspaq. Qazaqstannyń kók týyn kókte sharyqtatýdy maqsat etken sportshylarymyz qyzý daıyndyq ústinde.
Onyń ishinde Shyǵys Qazaqstan oblysynda sporttyń 7 túri boıynsha 18 adam Olımpıada oıyndaryna qatysýǵa úmitker retinde iriktelip otyr. Bul týraly búgin ShQO Aımaqtyq kommýnıkatsııalar qyzmetinde ótken baspasóz máslıhatynda óńirlik Dene shynyqtyrý jáne sport basqarmasy basshysynyń orynbasary Serik Qusymbaev aıtty.
«Jeńil atletıkadan úmitkerler qatarynda Nadejda Dýbovıtskaıa, Elına Mıhına, Janna Mamajanova, Galına ıAkýsheva, Deızı Djepkemeı, Karolına Kıpkırýı, Shaderak Koech, Nora Tanýı, erkin kúresten Azamat Dáýletbekov, Danııar Qaısanov, grek-rım kúresinen Ernar jáne Ernur Fıdahmetovalar,eskek esý slalomynan baıdarkalarda jáne kanoeda Aleksandr Kýlıkov, Qýanysh Ergaıypov, baıdarka men kanoede esý boıynsha Margarıta Torlopova, aýyr atletıkadan Denıs Ulanov jáne semserlesýden Rýslan Qurbanov pen Vadım Sharlaımov bar», - deıdi ol.
Onyń aıtýynsha, búgingi tańda Olımpıadany sanamaǵanda ártúrli sport túrleri boıynsha Qazaqstan Respýblıkasy quramasynyń sapynda shyǵysqazaqstandyq 707 sportshy óner kórsetip júr.
«2023 jyldyń 6 aıynda oblys sportshylary túrli sport túrleri boıynsha 3303 medal jeńip aldy. Onyń ishinde 1208 altyn, 1031 kúmis jáne 1064 qola bar. 300 sportshy 35 halyqaralyq týrnırge qatysýdy josparlap otyr. Al 170 sportshy Álem jáne Azııa chempıonattarynda baq synamaq», - deıdi Serik Qusymbaev.